ەليتالى مەكتەپتەردەگى ءبىر جىلدىق وقۋ قۇنى قانشا؟

 نۇر-سۇلتان. قازاقپارات - ايگىلى شەتەل كينولارىن تاماشالاپ وتىرىپ، ولاردىڭ بالالارى وقيتىن مەكتەپ جۇيەسىنە قىزىعا تاڭداي قاعىپ جۇرگەن شىعارسىز؟

«بالام وسىنداي مەكتەپتە وقىسا»، - دەپ ارمانداعان دا بولارسىز؟

ەندى، شەتەلدىك مەكتەپتەردىڭ وقۋ بازاسىنا قىزىعۋدىڭ قاجەتى شامالى. تەك، قالتاڭىز ۇياتقا قالدىرماي، بالاڭىز قابىلەتتى بولسا بولعانى. سەبەبى، ەليتالى، ساپالى ءبىلىم بەرەتىن، قالتالىلاردىڭ بالالارى قولجەتكىزە الاتىن مەكتەپ ءبىزدىڭ ەلدە دە بار.

ولاردىڭ بەرەتىن ءبىلىمى ەشبىر شەتەلدىك مەكتەپتەردەن كەم ەمەس. سوعان سايكەس، باعالارى دا ايتارلىقتاي جوعارى. ءتىپتى، قاراپايىم ستۋدەنتتىڭ ءبىر جىلدىق وقۋىنا تولەيتىن اقشاسىنان دا اسىپ تۇسەدى. سونىمەن قارجىسى دا، ءبىلىمى دە جوعارى ەلىمىزدىڭ باس قالاسىندا ورىن تەپكەن ءبىلىم وردالارىنىڭ ەرەكشەلىكتەرىمەن، باعدارلامالارى جانە باعالارىمەن تانىسا وتىرىڭىزدار.

العاشقى مەكتەپ Nurorda مەكتەپ- ليتسەيى. «Nurorda» مەكتەبىنىڭ باستى ماقساتى - باسەكەگە قابىلەتتى، جان-جاقتى دامىعان، ەركىن ويلاي الاتىن تۇلعا قالىپتاستىرۋ. وقۋشىلارعا وزدەرىن قىزىقتىرعان 19 ۇيىرمەنىڭ قالاعانىنا قاتىسۋعا مۇمكىندىك جاسالعان. 7 -سىنىپ وقۋشىلارىنا ەمتيحان ناتيجەلەرى بويىنشا %100 جەڭىلدىك ۇسىنادى. بۇل مەكتەپتىڭ جىلدىق وقۋ اقىسى - 2200000 تەڭگە.

«ميراس» حالىقارالىق مەكتەبىندە گرانتتار بولىنبەيدى. مەكتەپتە 12 ەلدەن كەلگەن ۇستازدار جۇمىس ىستەيدى. «ميراس» مەكتەبى وقۋشىلارعا ورتا ءبىلىمدى حالىقارالىق ستاندارتتارعا ساي ءبىلىم الۋعا جاعداي جاسايدى. وندا فرانسۋز تىلىندە وقىعىسى كەلگەن شەتەلدىك شاكىرتتەرگە ارنايى باعىتتا ساباق بەرىلەدى.

بۇل مەكتەپكە قابىلدانۋدىڭ باستاپقى قۇنى - 1-سىنىپتا 3,4 ميلليون.

ەلىمىزدىڭ باس قالاسىندا ورنالاسقان تاعى ءبىر اتى دارداي مەكتەپ «رەسپۋبليكالىق فيزيكا- ماتەماتيكا مەكتەبى» . مەكتەپ ىشىندە مەديا نارىقتا ۇلكەن سۇرانىسقا يە بولعان tedx باعدارلاماسى جۇرگىزىلەدى. قابىلداۋ كەزىندە مىندەتتى تۇردە اعىلشىن ءتىلىن ءبىلۋ دەڭگەيى تەكسەرىلەدى. وقۋ اقشاسى تومەنگى سىنىپتارعا - 800000، جوعارى سىنىپتارعا - 980000. ولاردا مەملەكەتتىك گرانت بولىنەدى.

ەل اراسىندا «NIS» اتالىپ كەتكەن فيزيكا-ماتەماتيكا باعىتىنداعى ءبىلىم بەرەتىن نازاربايەۆ زياتكەرلىك مەكتەبى اتا- انالاردىڭ بالالارىن وقىتقىسى كەلەتىن مەكتەپتەردىڭ قاتارىندا. ارتىقشىلىقتارى - 120 ورىنعا ارنالعان ينتەرنات، اعىلشىن ءتىلىن وتە جاقسى يگەرۋ، بەلسەندىلىك، شەت ەلدەرگە شىعۋ مۇمكىندىگى، جاڭا تەحنولوگيالار ارقىلى وقىتىلاتىن قىزىقتى، ءارى ساپالى ءبىلىم، IELTS- تى تەگىن تاپسىرۋعا جاعداي جاسالعان. ەكى كەزەڭدى قامتيتىن كونكۋرس بويىنشا بالالاردى قابىلدايدى. ءبىر جىلعى وقۋ اقىسى «وركەن» تۇڭعىش پرەزيدەنت ءبىلىم بەرۋ گرانتى بويىنشا بولىنەدى. ول ءۇشىن 7-11 -سىنىپ وقۋشىلارى تالاپقا ساي ءبىلىم تەكسەرۋ ەمتيحاندارىنان ءوتۋى كەرەك.

قارجىعا تاۋەلدى زاماندا، وقۋشىلاردىڭ ەكونوميكالىق تۇرعىدا ساۋاتتى تۇلەك بولعانى ارتىقتىق ەتپەيدى. ۇكىمەت ونى دا ويلاستىرىپ قويعان. ونىڭ كورسەتكىشى - ەكونوميكالىق ليتسەي.

«ەكونوميكالىق ليتسەيدە» وقۋ باعدارلاماسى بىرنەشە بولىمدەردى قامتيدى. كەڭەيتىلگەن وقۋ باعدارلاماسى بويىنشا اعىلشىن، ورىس تىلدەرىن، ۆيزۋالدى گەومەتريا، ەكونوميكا، شاحمات، ينفورماتيكا، ماتەماتيكا پاندەرىن وقيدى. قوسىمشا ساباقتار دا بار. بىلىكتىلىكتى ارتتىرۋ كۋرستارىنىڭ 10-11 -سىنىپتارى اعىلشىن ءتىلىن اپتاسىنا 6 ساعات وقيدى.

ستۋدەنتتەردى ليتسەيگە قابىلداۋ سۇحبات پەن تەستىلەۋگە نەگىزدەلگەن. قابىلداۋ وقۋعا بوس ورىن بولعان جاعدايدا ىسكە اسادى. ەكونوميكالىق ليتسەيدىڭ ءبىر جىلدىق وقۋ اقىسى - 700000 تەڭگە. گرانت ءبولۋ ماسەلەسى قاراستىرىلماعان، ياعني، بولىنبەيدى.

3-17 جاس ارالىعىنداعى جەتكىنشەكتەردى تاربيەلەيتىن «QSI حالىقارالىق مەكتەبى» وقۋشىلارعا اعىلشىن تىلىندە ءبىلىم بەرەدى. بالا اكادەميالىق ءبىلىم الۋ بارىسىندا ءبىلىمدى الىپ قانا قويماي، ونى قايدا جانە قالاي قولدانۋ كەرەكتىگىن بىلەدى. وقۋ جوسپارىنا ساي ماتەماتيكا، جاراتىلىستانۋ عىلىمدارىن، بەينەلەۋ ونەرىن، ينفورماتيكا، شەت تىلدەرى، مۋزىكا، مادەنيەت، دەنە تاربيەسىن تەرەڭدەتىپ وقىتادى.

حالىقارالىق مەكتەپتە، 30 وقۋ كابينەتى، كىتاپحانا، 3 كومپيۋتەرلىك سىنىپ، بەينەلەۋ ونەرىنە ارنالعان اۋديتوريا، عىلىمي زەرتحانا بار. مەكتەپ كىتاپحاناسىنان بالالار زاماناۋي كومپيۋتەرلىك باعدارلامالار ارقىلى 13 مىڭنان استام كىتاپ قورىن پايدالانۋعا مۇمكىندىك الادى. وندا قابىلدانۋ ءۇشىن ساۋالناما تولتىرۋ، بالانىڭ تۋۋ تۋرالى كۋالىگىنىڭ كوشىرمەسى، ونىڭ الدىندا وقىعان مەكتەبىنىڭ ەسەپ بەرۋ پاراعى، ەگۋ پاسپورتىنىڭ كوشىرمەسى، ءبىر رەت تولەنەتىن تىركەۋ جارناسىن تولەۋ قاجەت. ءبىر جىلدىق وقۋ اقىسى تەڭگەگە شاققاندا - 8440500 تەڭگە. گرانت بولىنبەيدى.

كەلەسى «Haileybury Astana»  مەكتەبى. ول انگليا مەن ءۋەلستىڭ اعىلشىن ءتىلىنىڭ ءبىلىم بەرۋ جۇيەسىنىڭ ستاندارتتارى مەن ۇلتتىق وقۋ جوسپارلارى بويىنشا وقىتاتىن حالىقارالىق IB مەكتەبى. 2-18 جاستاعى بالالارعا ءبىلىم بەرەدى. كەشەندى سپورت ورىندارى UEFA ستاندارتتارىنا ساي. وقۋ بلوكتارى، جاتتىعۋ زالى مەن فۋتبول الاڭى، جابىق ويىن الاڭدارىمەن قورشالعان امفيتەاترى بار. مەكتەپكە قابىلدانۋ ءۇشىن ۇمىتكەرلەر جازباشا تەست تاپسىرىپ، جوعارى سىنىپ قىزمەتكەرىمەن اڭگىمەلەسەدى.

ءبىر جىلدىق وقۋ اقىسى - 7735000 تەڭگە.

P. S. وسىدان ءبىراز ۋاقىت بۇرىن تانىمال «Forbes» جۋرنالى ءبىلىم بەرۋدە باعاسى قىمبات تۇراتىن ەليتالى مەكتەپتەر ءتىزىمىن جاريالاعان بولاتىن. ونداعى رەسمي دەرەك كوزدەرىنىڭ مالىمەتىنشە، الەمدەگى ەڭ باعالى ءبىلىم وشاعى «پاتشالار مەكتەبى» دەپ اتالىپ كەتكەن institut le rosey  مەكتەبى الدىڭعى ورىندا. ال، قازاقستاندىق اقىلى مەكتەپتەردىڭ قايسىسى باسەكە باسىندا؟ باعاسىنا قاراپ، باعامداي بەرىڭىز.