سۋديا گاۋھار الىمبەكوۆانى نەگە اقتاعانىن ءتۇسىندىردى

None
None
  نۇر-سۇلتان. قازاقپارات - الماتى قالالىق سوتتىڭ ءتوراعاسى نۇرعازى ءابدىحانوۆ تانىمال ءانشى، كومپوزيتور گاۋھار الىمبەكوۆانى نەگە اقتاعانىن ءتۇسىندىردى.

بۇعان دەيىن الىمبەكوۆا الاياقتىق ءۇشىن التى جىلعا باس بوستاندىعىنان ايىرىلعان بولاتىن. ال بۇگىن اپەللياتسيالىق سوت ۇكىمى بويىنشا ءانشى اقتالىپ شىقتى. سوت وتىرىسىنىڭ سوڭىندا سۋديا ءابدىحانوۆ نەگە مۇنداي ۇكىم شىعارعانىن ايتتى.

«بىرىنشىدەن، ايىپتاۋ ۇكىمىن بولجامدارعا نەگىزدەپ جاساۋعا بولمايدى. سوت تالقىلاۋ بارىسىندا ناقتى دالەلدەمەلەردىڭ جيىنتىعىن نەگىزگە الۋى قاجەت. ءبىرىنشى سوتتا دا، اپەللياتسيالىق سوتتا دا ءبىز مۇنداي دالەلدەمەلەر تاپپادىق. ەكىنشىدەن، سوت القاسىنىڭ وتىرىسىندا الىمبەكوۆا سوتتالۋشى وردابايەۆامەن بىرگە توپ بولىپ الدىن الا ءسوز بايلانىسپاعانى، جابىرلەنۋشى نازاروۆانىڭ اقشاسىن ادەيى جىمقىرماعانى انىقتالدى. كەرىسىنشە، سوت وتىرىسىندا انىقتالعانداي، الىمبەكوۆانىڭ ءوزى دە وردابايەۆادان الدانىپ، پاتەر الۋ ءۇشىن قاراجات بەرگەن. ءسويتىپ، اقشاسىنان جانە ءۇش بىردەي پاتەرىنەن ايىرىلعان»، - دەدى سۋديا نۇرعازى ءابدىحانوۆ.

سوت ۇكىمىنەن كەيىن گاۋھار الىمبەكوۆا ءوز اسەرىمەن ءبولىسىپ، حالىق جيناعان قاراجات جايلى پىكىرىن ايتقان بولاتىن. ول حالىقتان اقشا المايتىنىن، جينالعان قاراجاتتىڭ ءبارىن كەرى قايتاراتىنىن ءمالىم ەتكەن.



Kaz.tengrinews.kz

سوڭعى جاڭالىقتار