سەنات دەپۋتاتتارى قىتايدان قارىز الۋ تۋرالى كەلىسىمدى ماقۇلدادى
20 جىلعا ەكى پايىزبەن الىنعالى جاتقان قارىز كولەمى - 2 ميلليارد يۋان (شامامەن 113 ميلليارد تەڭگە). نۇر-سۇلتان بۇل اقشاعا شەكارادا توعىز كولىك جانە ءبىر تەمىرجول وتكىزۋ بەكەتىن «جاڭعىرتۋدى جانە تەحنيكالىق جاراقتاندىرۋدى» جوسپارلاپ وتىر.
- ەۋرازيا ەكونوميكالىق وداعى سىرتقى شەكاراسىنىڭ قازاقستاندىق ۋچاسكەسىندە وتكىزۋ پۋنكتەرىنىڭ كەدەندىك ينفراقۇرىلىمىن دامىتۋ قاجەت. قازىرگى ينفراقۇرىلىممەن كولىكتەردى جەدەل ءارى كەزەكسىز وتكىزۋ مۇمكىن ەمەس. بۇعان قازاق-وزبەك شەكاراسىنداعى احۋال دالەل. قازاقستان جاعىنداعى وتكىزۋ پۋنكتىندە كۇن سايىن 100-300 كولىك كەزەكتە تۇر، تاۋار تاسىمالداۋشىلار ءۇش تاۋلىككە دەيىن كەزەك كۇتەدى، - دەدى قازاقستان پرەمەر-ءمينيسترىنىڭ ءبىرىنشى ورىنباسارى، قارجى ءمينيسترى ءاليحان سمايىلوۆ.
مينيستر سمايىلوۆ شەكارا بەكەتتەرىن جوندەۋ جۇمىستارى بيىل جىل سوڭىندا باستالىپ، 2022-جىلى اياقتالاتىنىن حابارلادى. جوسپار بويىنشا، الدىمەن قازاقستاننىڭ قىتاي مەن وزبەكستان شەكاراسىنداعى وتكىزۋ بەكەتتەرى جوندەلەدى. ورناتىلاتىن تەحنيكانىڭ 70 پايىزى قىتايدان ساتىپ الىنادى.
كورشى ەكى ەل اراسىنداعى نەسيە كەلىسىمىنە 2018-جىلى ماۋسىمدا بەيجيڭدە قازاقستان پرەزيدەنتى نۇرسۇلتان نازاربايەۆ پەن قىتاي باسشىسى شي جينپيڭ قول قويعان.
«ازاتتىق»