ءتىل رەفورماسىنىڭ ناتيجەسى قانداي بولادى

نۇر- سۇلتان. قازاقپارات - احمەت بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى، پروفەسسور ەردەن قاجىبەك تەرمينولوگيا سوزدىكتەرىن شىعارۋ جوسپارلارى تۋرالى ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، ارنايى باعدارلاما اياسىندا تەرمينولوگيالىق سوزدىكتەردى شىعارۋ جوسپارلانىپ وتىر. وسى جۇمىس كەلەسى جىلى باستاۋىش مەكتەپتەن باستالادى.

 «ءبىر جىل ىشىندە باستاۋىش مەكتەپتەر پايدالاناتىن تەرميندەر سوزدىگىن شىعارامىز. 2021 -جىلى 5-9 - سىنىپتار، ياعني نەگىزگى ءبىلىم بەرۋ تەرمين قورى انىقتالادى. 2022 -جىلى ورتا جانە كاسىپتىك ءبىلىم - 10-11 - سىنىپتار، كوپتەگەن كوللەدج بەن تەحنيكۋم وقۋشىلارى ءۇشىن بىرنەشە تومدىق تەرمينولوگيالىق سوزدىكتەردى جاساۋىمىز قاجەت. 2023 -جىلى جوعارى وقۋ ورىندارى دەڭگەيىندە 20 قالىڭ قوعامدىق عىلىمدار بويىنشا سالالىق تەرمينولوگيالىق سوزدىك بىتەدى. 2024 -جىلى 15 سالالىق تەحنيكا عىلىمدارى بويىنشا سوزدىكتەر دايىن بولۋى كەرەك. ال 2025 -جىلى ەلباسى تاپسىرماسى بويىنشا ءبىز ءتىل رەفورماسىن تولىق اياقتاۋعا ءتيىسپىز. جاراتىلىس تانۋ عىلىمدارى بويىنشا 15 تومدى ازىرلەۋ جوسپارلانىپ وتىر. وسىلايشا، تۇبەگەيلى ءتىل رەفورماسىنىڭ ناتيجەسىندە جاڭا 50 شاقتى تەرمينولوگيالىق فوليانتتى عىلىمي قاۋىمداستىققا پاش ەتپەكپىز»، - دەدى ە. قاجىبەك ق ر پارلامەنت ماجىلىسىندە وتكەن عىلىمي- پراكتيكالىق كونفەرەنسيادا.

ينستيتۋت باسشىسىنىڭ سوزىنە قاراعاندا، بەلگىلى ءبىر سالانى دامىتۋ ءۇشىن كەم دەگەندە 10 مىڭ تەرمين قاجەت. بۇل - عالىمداردىڭ پايىمى.

 «تەرميندەردىڭ سانى 10 مىڭنان از بولعان جاعدايدا ناقتى ءبىر سالا تولىققاندى دامىمايدى ەكەن. ولاي بولسا، ىرىكتەلگەن 50 سالانى دامىتۋ ءۇشىن بىزگە كەمىندە، بەكىتىلگەن 500 مىڭ تەرمين كەرەك. ال وتىز جىلدىڭ ىشىندە ءبىزدىڭ تەرمينكوم 20 مىڭنىڭ اينالاسىندا عانا تەرميندى بەكىتكەنىن ەسكەرسەك، مەملەكەتتىك ءتىلىمىزدى دامىتۋدىڭ قاي ساتىسىندا تۇرعانىمىز ايقىن»، - دەپ اتاپ كورسەتتى ە. قاجىبەك.

اۆتور: ارمان اسقاروۆ