قازاقستاندىق ەكى فيلم يرانداعى فەستيۆالگە قاتىسادى
«قازاق فيلم» كينوستۋدياسىنىڭ مالىمەتىنشە، كاسپي ماڭى ەلدەرىنىڭ فيلمدەرىنە نەگىزدەلگەن بۇل فەستيۆال كەلەسى تاقىرىپتارعا تۇسىرىلگەن تۋىندىلارعا اسا نازار اۋدارادى، ولار: سالت-جورالعىلار، ۇلتتىق جانە ءدىني داستۇرلەر، اڭىز-اڭگىمەلەر، پوەزيا، سونداي-اق ۇلتتىق ارحيتەكتۋرا، قولونەر جانە شارۋا جۇرگىزۋ تاسىلدەرى تۋرالى فيلمدەر.
اتالعان ەكى كينوتۋىندىنى ق ر مادەنيەت جانە سپورت مينيسترلىگى تاپسىرىسى بويىنشا ش. ايمانوۆ اتىنداعى «قازاق فيلم» كينوستۋدياسى تۇسىرگەن.
«13 شاقىرىم» اتتى دەرەكتى فيلم سەرىك بودانبايەۆ ەسىمدى زاعيپ تۋرالى باياندايدى. قىستاۋدان ءوز اۋىلىنا قاراي بەت العان باستى كەيىپكەر ءوز ءومىرىنىڭ ەلەۋلى ساتتەرىن ەسكە الىپ، ءوز بويىنداعى قۇندىلىقتارىنىڭ سىرىن اشادى.
- فيلم الەمدەگى كوپتەگەن فەستيۆالدەرگە قاتىسىپ، جۇلدەلى ورىنداردان كورىندى. ەندى مىنە، يرانداعى فەستيۆالدە باق سىناماق، - دەدى فيلمنىڭ رەجيسسەرى ۆلاديمير تيۋلكين.
ال بەرىك جاحانوۆتىڭ «اتا- كاسىپ» دەرەكتى فيلمى «قازاقستاننىڭ تۇركى تەكتەس حالىقتارى» تسيكلى بويىنشا ارنايى تۇسىرىلگەن. بۇل دەرەكتى تسيكل كوپ ۇلتتى قازاقستاندا تۇراتىن تۇركى ەتنوسىنا ارنالعان. اتالعان دەرەكتى فيلم وزبەك ۇلتى تۋرالى، ونىڭ ىشىندە اتا-كاسىپ - بەسىك جاساۋمەن اينالىساتىن 47 جاستاعى ابدۋمانات ەسىمدى شەبەردىڭ ءومىرىن باياندايدى.
- فيلم يراندا كورسەتىلەتىنىنە قۋانىشتىمىن. ءتۇسىرۋ توبىنا جانە دە ماعان سەنىپ، ەرەكشە قولداۋ بىلدىرگەن «قازاق فيلم» كينوستۋدياسى «دەرەكتى كينو» شىعارماشىلىق بىرلەستىگىنىڭ جەتەكشىسى اسەت ەرنازاروۆقا العىسىمدى ايتامىن، - دەدى رەجيسسەر بەرىك جاحانوۆ.
