جاپونيانىڭ قازاقستانداعى ەلشىسى سەمەي مەكتەپتەرىن ارالادى

ايماققا ساپارى بارىسىندا تاتسۋحيكو كاساي سەمەيدىڭ اكىمى ەرماك سالىموۆپەن كەزدەستى. ءوز كەزەگىندە اكىم قالا قوناعىنا قالانىڭ تاريحى مەن كورنەكى جەرلەرى تۋرالى ايتىپ، سەمەي مەكتەپتەرى ءۇشىن كورسەتىپ جاتقان كومەك ءۇشىن العىس ءبىلدىردى.

 ويتكەنى قالادا بىرنەشە جىل «كورني تراۆى» الەۋمەتتىك جوباسى ىسكە اسۋدا. اتالمىش جوبا اياسىندا 11 ءبىلىم بەرۋ مەكەمەسىنىڭ جوندەۋ جۇمىستارىنا قارجىلىق كومەك كورسەتىلدى. مىسالى قالاداعى №23 مەكتەپتىڭ 195 تەرەزەسى، №25​ مەكتەپتە 209، ال №3 مەكتەپتە 241 ەسكىرگەن تەرەزە اۋىستىرىلدى. ەلشى اتالعان مەكتەپتەرگە ات باسىن ارنايى بۇرىپ، اتقارىلعان جۇمىس بارىسىمەن تانىستى.

 تاتسۋحيكو كاساي ءوز سوزىندە الەۋمەتتىك جوبانىڭ سەمەيدە ارى قاراي جۇزەگە اساتىنىن ايتتى.

 «ءبىزدىڭ جوبانىڭ كومەگى ءتيىپ جاتقانىنا مەن وتە قۋانىشتىمىن. سەبەبى، وقۋشىلار جايلى سىنىپتاردا ءبىلىم الىپ جاتىر. سوندىقتان الداعى ۋاقىتتا دا جوبا ءوز جۇمىسىن جالعاستىرادى»، - دەدى جاپونيانىڭ قازاقستانداعى توتەنشە جانە وكىلەتتى ەلشىسى تاتسۋحيكو كاساي.

ايتا كەتۋ كەرەك، 22 جىلدىڭ ىشىندە جاپونيالىق تاراپ ەلىمىزدە اتالمىش جوبا شەڭبەرىندە 100 الەۋمەتتىك جوبانى ىسكە اسىرسا، سونىڭ 24- ءى شىعىس وڭىرىنە تيەسىلى.

اۆتور: باعىم عالىمبەك قىزى