سەمەيلىك وقۋشىنىڭ زەرتتەۋ جۇمىسى رەسەيدەن جۇلدەمەن ورالدى
10-سىنىپ وقۋشىسى «عىلىم مەن تەحنيكاداعى جاس زەرتتەۋشىلەر» اتتى زەرتتەۋ جۇمىستارى بايقاۋىنا «جەلىلىك ەروزيا» اتتى جوباسىمەن قاتىستى. ول وسى ارقىلى ءتيىستى سالا ماماندارىنىڭ نازارىن بورودۋليحا اۋدانى، نوۆوپوكروۆكا اۋىلىنداعى جىرالاردىڭ پايدا بولۋى مەن ونىڭ قورشاعان ورتاعا تيگىزەتىن اسەرىنە اۋدارعىسى كەلگەن. جوبانى قورعاۋ ءۇشىن وقۋشى ءبىر جىل بويى زەرتتەۋ جۇرگىزگەن. ەكى مارتە نوۆوپوكروۆكا اۋىلىنا بارىپ، اۋىلداعى جىرالاردىڭ جىلىنا 10-40 مەتر ارالىعىندا كەڭەيىپ كەلە جاتقانىن اڭعارعان.
«بۇل ءوز كەزەگىندە سول اۋىلداعى عيماراتتارعا، اعاشتارعا، قۇدىقتارعا كەرى اسەر ەتىپ، ولاردى قيراتادى. ودان بولەك، جولدىڭ ءبۇلىنۋى مەن ەگىستىك القاپتاردىڭ زاقىمدانۋىنا دا ىقپال ەتپەي قويمايدى. قاراپ وتىرساڭىز، تابيعاتقا، ءتىپتى ادام ومىرىنە دە ءقاۋىپ توندىرەتىن جايت. سوندىقتان بۇعان بەي- جاي قاراماۋىمىز كەرەك. زەرتتەۋ جۇمىستارىنىڭ قورىتىندىسى بويىنشا عىلىمي كەڭەسشىم «سەمەي گيدرو گەولوگيا» ج ش س- ءنىڭ ينجەنەر- گيدروگەولوگى لاريسا گۋشينا ەكەۋمىز جەرگىلىكتى شارۋا قوجالىقتارى باسشىلارىنا قاۋىپ پەن وراسان شىعىننىڭ الدىن- الۋ تۋرالى ەسكەرتتىك. ەندىگى جۇمىس سولاردىڭ ەنشىسىندە»، - دەيدى جاس تابيعات جاناشىرى ريشات مەيىرجان ۇلى.
رەسەيدىڭ تومسك قالاسىندا وتكەن كونفەرەنسيا- بايقاۋعا 300-دەن اسا وقۋشى قاتىسىپ، ءتۇرلى تاقىرىپتاردا ءوز جوباسىن قورعاعان. سونىڭ اراسىندا ريشاتتىڭ ەڭبەگى جوعارى باعالانىپ، ءبىرىنشى ورىنعا يە بولدى.
گەوگرافيا ءپانىن ءسۇيىپ وقىپ، تابيعات قۇبىلىستارىنا قىزىعاتىن وقۋشى جەڭىسكە جەتۋىنە مەكتەپتىڭ گەوگرافيا ءپانى مۇعالىمى شاريپا تالاسپايەۆا مەن حيميا ءپانىنىڭ مۇعالىمى جازيرا قۇرمانوۆالاردىڭ كوپ كومەگى تيگەنىن اتاپ ءوتتى.
ريشات جەڭىسكە جەتۋ ارقىلى كەلەر جىلى رەسەي استاناسى ماسكەۋ قالاسىندا وتەتىن حالىقارالىق ۆ. ۆەرنادسكي كونفەرەنسياسىنا شاقىرتۋ الدى.
اۆتور: باعىم عالىمبەك قىزى
