پاتەرلەرىن جالعا بەرەتىندەرگە قانداي تالاپ قويىلادى؟
«ءوزىنىڭ باسپاناسىن جالعا بەرۋگە ءاربىر ادامنىڭ قۇقىعى بار، بۇل ءوز كەزەگىندە كوبىسى ءۇشىن بيزنەسكە اينالعان. ال قوعامدىق ءتارتىپ، وسى بيزنەستى پايدالانۋ ەرەجەسى عيمارات ىشىندە مىندەتتى تۇردە ورىندالۋى كەرەك. ياعني، بۇل باسپانا ءبىر تاۋلىككە نەمەسە ءبىر ايعا جالعا بەرىلسە دە، ءتارتىپ بولۋى قاجەت»، - دەدى ۆەدومستۆو باسشىسى.
مينيستر تۇرعىن ۇيلەردەگى تارتىپكە جەرگىلىكتى اتقارۋشى ورگاندار دا قوسىلۋى كەرەكتىگىن اتاپ ءوتتى.
«بۇل باعىتتا جەرگىلىكتى اتقارۋشى ورگاندار، جەرگىلىكتى پوليتسەيلەر، تۇرعىنداردىڭ وزدەرى ۇلەستەرىن قوسۋى كەرەك. ەگەر جالعا بەرىلگەن پاتەرلەردە تارتىپسىزدىك ورىن السا، ءتيىستى شارالار قابىلدانعانى دۇرىس. نەگىزى، جۇمىس توبىنداعى تالقىلاۋ كەزىندە وسىنداي بيزنەسپەن اينالىساتىن ازاماتتاردىڭ قۇقىقتارىن شەكتەمەۋ شەشىمىن قابىلدادىق. ولار سالىق كوميتەتىندە تىركەلىپ، پاتەنت الىپ، ءوزىنىڭ پاتەرىندەگى ءتارتىپتى باقىلاۋى ءتيىس»، - دەدى رومان سكليار.
بۇدان بۇرىن حابارلانعانداي، پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي-كوممۋنالدىق شارۋاشىلىق ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
«زاڭ جوباسى كەلەسى نەگىزگى ماسەلەلەردى شەشۋگە باعىتتالعان، ياعني «ءبىر ءۇي - ءبىر بىرلەستىك - ءبىر شوت» قاعيداسى بويىنشا «مۇلىك مەنشىك يەلەرىنىڭ بىرلەستىگى» كوممەرتسيالىق ەمەس ۇيىمنىڭ جاڭا فورماسىن قۇرۋ ارقىلى باسقارۋ ورگاندارىنىڭ قىزمەتىن رەتتەۋ. ۇسىنىلعان پرينتسيپ ءار ءۇيدى باسقارۋدىڭ جەكە ءتاسىلىن قاراستىرادى. ءار مۇلىك مەنشىك يەلەرىنىڭ بىرلەستىگى ءوزىنىڭ اعىمداعى جانە جيناقتاۋشى شوتتارىن اشاتىن بولادى. اتالعان شارا پاتەر يەلەرى كووپەراتيۆتەرى جانە باسقارۋشى كومپانيالار تاراپىنان قىزمەتتەر مەن تاريفتەردىڭ تۇرعىندارعا جۇكتەلمەۋىن جانە قارجىلارىنىڭ اشىق جۇمسالۋىن قامتاماسىز ەتەدى. سونداي-اق تۇرعىنداردىڭ باسقارۋ ءتاسىلىن تاڭداۋ قۇقىعى جەكە باسقارۋ ورگاندارى ارقىلى نەمەسە شارت نەگىزىندە باسقارۋشى كومپانيالار ارقىلى بەرىلەدى»، - دەدى يندۋستريا جانە ينفراقۇرىلىمدىق دامۋ ءمينيسترى رومان سكليار.