اقتوبە تەمىرجول ۆوكزالى: اقىلى اۆتوتۇراق پەن بيلەت الۋ كەزەگىنە شاعىم كوپ
اقتوبەنىڭ تەمىرجول ۆوكزالى ماڭىنداعى اۆتوتۇراق 5 جىلعا سەنىمگەرلىك باسقارۋعا بەرىلدى. 2018 -جىلدىڭ سوڭىندا اۆتوتۇراقتى سەنىمگەرلىك باسقارۋعا العان «اقتوبە پاركينگ» كومپانياسى ءار كولىك ءۇشىن 100 تەڭگە الادى. ال گازەلگە 150، اۆتوبۋسقا 300 تەڭگە بەكىتىلگەن. سونىمەن قاتار اۆتوتۇراق قىزمەتى 15 مينۋتقا تەگىن. ءبىراق بۇل تۋرالى ەش جەردە جازىلماعان، قىزمەتكەرلەر دە كەلۋشىلەرگە ەسكەرتۋ جاسامايدى.
«قالالىق اكىمدىكپەن بىرگە جاسالعان اۆتوتۇراق 365 ورىنعا ارنالعان. كىرەبەرىستە 15 مينۋت اقىسىز دەپ جازىلماعان. تازالىق ساقتالماعان، اۋماق لاس. اۆتوتۇراقتىڭ 20-30 پايىزىن تاكسي قىزمەتى يەلەنىپ وتىر. ولاردىڭ ليتسەنزياسى بار-جوعى بەلگىسىز. قىزمەت اۆتوماتتاندىرىلماعان سوڭ شىنايى كورسەتكىش بىلىنبەيدى»، - دەدى «ادالدىق الاڭى» جوباسىنىڭ جەتەكشىسى جانبولات تورتايەۆ.
جولاۋشىلارى اقتوبە تەمىرجول ۆوكزالىنا بارىپ، بيلەت ساتىپ الۋ ءۇشىن 1 ساعات ۋاقىتىن سارپ ەتەدى. رەيد كەزىندە جولاۋشىلار مۇنى راستادى.
«بيلەت ساتىپ الۋ ءۇشىن ۆوكزالدا وتىرعانىما 40 مينۋت بولدى. ءالى كەزەگىم كەلمەدى. جانىمىزدا ءبىر ۇلكەن كىسى وتىر، ول ەكى رەت ەلەكتروندى كەزەك ءنومىرىن العان، ەكەۋى دە ءوتىپ كەتكەن. ەشكىم ايتىپ، جول سىلتەمەدى. كەم دەگەندە 1 - 1,5 ساعات وتىرامىز، ەشقانداي جاعداي جاسالماعان. كوبى كۇتىپ، جەكەگە كەتىپ قالادى»، - دەدى جولاۋشى ارمان مۇحامبەتوۆ.
ايتا كەتەيىك، اقتوبە ۆوكزالىندا 7 كاسسا جۇمىس ىستەسە، ونىڭ ەكەۋى اقىلى. تەمىرجول ۆوكزالى الداعى ۋاقىتتا كاسسا سانىن تاعى ارتتىرماق.
«بىزدە ەلەكتروندى كەزەك بار. الداعى ۋاقىتتا قىزمەت كورسەتۋ كاسساسىنىڭ سانىن ارتتىرامىز. تالاپ بويىنشا 1 ادام بيلەت الۋى ءۇشىن 30 مينۋت كۇتۋى قاجەت. ءبىراق ءۇزىلىس كەزىندە نەمەسە توپتىق بيلەت راسىمدەۋدە جولاۋشىلار ۇزاق ۋاقىت كۇتىپ قالادى. نەگىزى اقىلى نەمەسە تەمىرجولدىڭ كاسساسىنا بيلەت بىردەي بەرىلەدى، كىم ءبىرىنشى راسىمدەسە، سول الادى. ءبىز زاڭسىز بيلەت ساتۋعا توسقاۋىل قويۋ ءۇشىن جۇمىس ىستەپ جاتىرمىز. «جولاۋشىلار تاسىمالى» ا ق، ۆوكزال بىرلەسىپ، كوميسسيا تەكسەرۋىنەن سوڭ ناتيجە شىعارامىز»، - دەدى اقتوبە ۆوكزالىنىڭ باستىعى تويبازار قۋانىشيەۆ.
ونىڭ ايتۋىنشا، جولاۋشىلار اقىلى اۆتوتۇراققا ءجيى شاعىم ايتادى.
