ۇزاق جىلدار بويى بيلىك باسىندا جۇرگەن پرەزيدەنتتەر
پورتالدىڭ ءساۋىر ايىنداعى تىزىمىنە 13 ەلدىڭ پرەزيدەنتى ەنگەن. نەگە 13 باسشى ەنگەنى جايلى اقپارات بەرىلمەگەن. ادەتتە مۇنداي رەيتينگتىك تىزىمدەر 10 نەمەسە 15 بولىپ تۇزىلەتىن. بالكىم، 13,5 جىل گەرمانيانى باسقارىپ كەلە جاتقان انگەلا مەركەلدى قوسقىسى كەلمەگەن بولار.. . ءساۋىر ايىنىڭ باسىندا الجير ەلىن 20 جىل باسقارعان ابدەل ازيز بۋتەفليك قىزمەتىنەن كەتتى. 82 جاستاعى پرەزيدەنت دەنساۋلىعىنا بايلانىستى 2013 -جىلدان بەرى كوپشىلىك الدىنا شىعىپ، جولداۋ جاساماعان. تاعى ءبىر رەت سايلاۋعا قاتىسۋعا نيەت بىلدىرگەنمەن، ەل حالقى قارسى بولدى.
قازىرگى تاڭدا ەڭ كوپ ۋاقىت ەل باسقارىپ وتىرعان پرەزيدەنتتەر كوشىن ەكۆاتورلىق گۆينەيا ەلىنىڭ باسشىسى تەودورو وبيانگ نگەما مباسوگو باستاپ تۇر. ول بيلىك تىزگىنىن 1979 -جىلى اسكەري توڭكەرىس جاساپ ۇستاعان بولاتىن. باسشىلىقتا بولعانىنا بيىل 40 جىل تولادى. ۇزاق جىلدار بويى ەلىن باسقارىپ جۇرگەن الەم پرەزيدەنتتەرى تىزىمىنە كامەرۋن، كامبودجا، ۋگاندا، يران، سۋدان، چاد، ەرەترەيا، تاجىكستان، بەلورۋس، كونگو رەسپۋبليكاسى، دجيبۋتي جانە رەسەي ەلىنىڭ باسشىلارى ەنگەن. پورتالدىڭ رەيتينگى بىرەر اي بۇرىن جاريالانعاندا بۇل تىزىمگە قازاق ەلىن 29 جىل باسقارعان ەلباسى نۇرسۇلتان ءابىش ۇلى نازاربايەۆ تا ەنگەن بولار ەدى.
Massaget.kz
