مينيستر ساپاربايەۆ قاجەتسىز قۇجاتتار سۇرايتىن ماماندار بار ەكەنىن مويىندادى

نۇر- سۇلتان. قازاقپارات - اتاۋلى الەۋمەتتىك كومەك راسىمدەۋ ءۇشىن ۇزىن- سونار كەزەككە تۇرىپ، اسىعىستىق تانىتۋدىڭ قاجەتى جوق.

  بۇل تۋرالى بۇگىن ۇكىمەت وتىرىسىنان كەيىنگى باسپا ءسوز ءماسليحاتىندا ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ ايتتى، دەپ حابارلايدى قازاقپارات ءتىلشىسى.

«نۇر- سۇلتانداعى بىرنەشە جۇمىسپەن قامتۋ ورتالىعىنا بارعانىمدى وزدەرىڭىز دە كورگەن شىعارسىزدار. وكىنىشكە وراي العاشقى كۇندەرى، اسىرەسە، ءبىرىنشى ون كۇندىكتە كەزەك بولدى. ءبىز بىرنەشە مارتە بارلىعىنىڭ بىردەن بارۋىنىڭ قاجەتى جوق ەكەندىگىن ايتقان دا ەدىك. قۇجاتتاردى تاعايىنداۋ جانە قابىلداۋ ونىڭ ءساۋىردىڭ 20-ىندا الدە 29-ىندا تاپسىرىلعانىنا قاراماستان ءبىر اي بويى جۇرگىزىلەدى»، - دەدى ول.

سونىمەن قاتار بەردىبەك ساپاربايەۆ اتاۋلى الەۋمەتتىك كومەكتى تاعايىنداۋ بارىسىندا تەك جەكە كۋالىك قانا قاجەت ەتىلەتىندىگىن باسا ايتتى.

«قاجەتسىز قۇجاتتاردى تالاپ ەتۋگە قاتىستى ايتار بولسام، وكىنىشكە وراي ونداي ماماندار بار. الايدا، ءبىز بىرنەشە مارتە تەك جەكە كۋالىك تالاپ ەتىلەتىندىگىن ايتقان ەدىك. دەگەنمەن، ءوزىم بارعان كەزىمدە مۇنداي كەلەڭسىزدىكتەردى انىقتاپ، جۇمىسپەن قامتۋ ورتالىقتارىنىڭ باسشىلىعىنا، اكىمدىكتەرگە ولاردىڭ قاجەتسىز قۇجاتتاردى تالاپ ەتپەۋىن تاپسىردىق»، - دەدى مينيستر.

اۆتور: مارلان جيەمباي