قوستانايدا بىرنەشە اۋىل بىرىكتىرىلمەك

قوستاناي. قازاقپارات - قوستاناي وبلىسىندا اۋىلدىق وكرۋگتەردى وڭتايلاندىرۋ ءۇشىن بىرىكتىرۋ جۇمىستارى جۇرگىزىلۋى مۇمكىن.

بۇل بيۋدجەتتىڭ دەربەس دەڭگەيىنە كوشۋ كەزىندە ولاردىڭ قىزمەتىنىڭ تيىمدىلىگىن ارتتىرۋعا بايلانىستى، دەپ حابارلايدى قازاقپارات وبلىستىق قارجى باسقارماسىنىڭ باسشىسى الما ءجۇسىپوۆاعا سىلتەمە جاساپ.

2018 -جىلى جەرگىلىكتى ءوزىن- ءوزى باسقارۋ بيۋدجەتتەرىنە 1,3 ميلليارد تەڭگە تابىس تۇسكەن. الما ءجۇسىپوۆا اتاپ وتكەندەي، ونىڭ ىشىندە جەكە تابىس سالىعى - %45,6 جانە كولىك سالىعى %45,8- دى قۇرايدى.

«اۋىلدىق وكرۋگتەردە اكىمشىلىك ايىپپۇلداردى جيناۋ بويىنشا جۇمىستار ءالى دە جەتكىلىكسىز دەڭگەيدە جۇرگىزىلۋدە. 2018 -جىلى وسى باعىتتاعى تۇسىمدەر 3 اۋىلدان 469 مىڭ تەڭگە عانا بولدى. اتاپ ايتقاندا، بيۋدجەتكە مەڭدىقارا اۋدانىنىڭ پەرۆوماي اۋىلدىق وكرۋگى جانە رۋدنىيداعى قاشار جانە زاتوبول كەنتتەرى ءتۇسىپ جاسادى. قازىرگى ۋاقىتتا ايىپپۇلدىڭ 18 ءتۇرى بار ەكەنىن اتاپ ءوتۋ كەرەك»، - دەدى ول.

الما ءجۇسىپوۆانىڭ سوزىنشە، بيۋدجەتتىڭ دەربەس دەڭگەيىن كەدەرگىسىز ەنگىزۋ ءۇشىن اۋىلدىق وكرۋگ اكىمدەرى اپپاراتتارىندا بارلىق جاعداي جاسالعان. جەرگىلىكتى ءوزىن-ءوزى باسقارۋعا كوشكەن 45 اۋىلدىق وكرۋگ قارجىلاندىرىلۋمەن، اۆتوكولىك قۇرالدارىمەن، كومپيۋتەرلىك جابدىقتارمەن، باعدارلامالىق ونىمدەرمەن قامتاماسىز ەتىلگەن، جىلدام ينتەرنەتكە قوسىلعان.

«2020 -جىلدىڭ 1 -قاڭتارىنان باستاپ بارلىق اۋىلدىق وكرۋگتەر بيۋدجەتتىك ۇدەرىستى جانە كوممۋنالدىق مەنشىكتى دەربەس باسقارۋعا كوشەدى. سوندىقتان قىزمەت تيىمدىلىگىن ارتتىرۋ ماقساتىندا اۋىلدىق وكرۋگتەردى بىرىكتىرۋ جولىمەن وڭتايلاندىرۋ مۇمكىندىگىن قاراستىرۋ قاجەت دەپ سانايمىن»، - دەپ ۇسىنىس جاسادى قارجى باسقارماسىنىڭ باسشىسى وبلىس اكىمىنە.

مىسالى، قوستاناي اۋدانىنىڭ ي. ف. پاۆلوۆ اتىنداعى اۋىلدى تاراتۋ ۇسىنىلدى. وندا 494 ادام تۇرادى. اكىمدىكتە 6 ادام جۇمىس ىستەيدى جانە جەكە اپپاراتى بار. ەندى وسى اۋىلدى 6 شاقىرىم قاشىق ورنالاسقان الەكساندروۆكا اۋىلىنا قوسۋ قاجەتتىلىگى ايتىلدى. اتالعان اۋىلدا 1723 ادام تۇرادى.

«اكىمشىلىك- اۋماقتىق بىرلىكتەردى وڭتايلاندىرۋ اكىمشىلىك شىعىستاردى قىسقارتۋعا عانا ەمەس، سونداي- اق اۋىلدىق دەڭگەيدە دەربەس بيۋدجەتتى نەعۇرلىم ءتيىمدى ەنگىزۋگە مۇمكىندىك بەرەدى. بۇل جۇمىس قاراسۋ اۋدانىنىڭ اكىمدىگى جۇرگىزىلدى، ناتيجەسىندە 6 اۋىلدىق وكرۋگ تاراتىلىپ، 17 شتاتتىق بىرلىك بوسادى. ناتيجەسىندە جىل سايىنعى ۇنەمدەۋ سوماسى 50 ميلليون تەڭگەدەن استى. وسىنداي جۇمىستار ارقالىق قالاسىندا دا جۇرگىزىلۋدە»، - دەدى الما ءجۇسىپوۆا.