باس پروكۋراتۋرا جەلىدە تاراعان رىسقاليەۆتىڭ ۆيدەوسىنا قاتىستى پىكىر ءبىلدىردى

نۇر-سۇلتان. قازاقپارات - ق ر باس پروكۋراتۋراسى الەۋمەتتىك جەلىلەردە تاراعان ۆيدەوعا قاتىستى پىكىر ءبىلدىردى.

وندا ءىرى كولەمدە اقشا جىمقىرعان بەرگەي رىسقاليەۆ كوشەدە ءجۇر، دەپ حابارلايدى قازاقپارات ءتىلشىسى.

باس پروكۋروردىڭ ورىنباسارى مارات احمەتجانوۆتىڭ ايتۋىنشا، اتىراۋ وبلىسىنىڭ ەكس-اكىمى بەرگەي رىسقاليەۆتى ۇلى بريتانيادا ءتۇسىرىپ العان. اتالعان مەملەكەتپەن سوتتالعان ازاماتتاردى ۇستاپ تاپسىرۋ بويىنشا ءوزارا كەلىسىم جوق. دەگەنمەن، جەمقور شەنەۋنىكتى باسقا جولدارمەن الدىرتۋ شارالارى قاراستىرىلىپ جاتىر.

«ارينە، ءبىز ول ۆيدەونى كوردىك. ەندى، ول - حالىقارالىق ىزدەۋدە جۇرگەن ازامات. ءبارىڭىز بىلەسىزدەر، قازاقستاندا وعان قاتىستى قىلمىستىق ءىس بار. سوندىقتان ونىڭ جاۋاپكەرشىلىگى ءالى دە قارالادى. وكىنىشكە قاراي، بىزدە ۇلى بريتانيامەن قاشىپ كەتكەن ازاماتتاردى ءبىر-بىرىمىزگە بەرۋگە قاتىستى كەلىسىم جوق. ءبىراق ءبىزدىڭ بارلىق قۇقىقتىق سۇراۋلارىمىز ينتەرپولعا دا، بارىنە جان-جاقتى جىبەرىلدى»، - دەدى م. احمەتجانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ايتا كەتەيىك، تەرگەۋ ماتەريالدارى بويىنشا بەرگەي رىسقاليەۆ قولاستىنداعى سىبايلاستارىمەن بىرگە مەملەكەت قاراجاتىن قىلمىستىق جولمەن جىمقىرۋ جوسپارىن جاساعان. ولاردىڭ بۇل ارەكەتىنەن كەلگەن زالالدىڭ كولەمى 72 ميلليارد تەڭگەگە باعالاندى.

قىلمىستىق ءىستىڭ فيگۋرانتتارى: ب. رىسقاليەۆ، ونىڭ اعاسى ا. رىسقاليەۆ جانە 7 ادام، قىلمىستىق ءىس 754 تومنان تۇرادى. ب. رىسقاليەۆتىڭ كومانداسىنا قاتىستى العاشقى سوت 2014 -جىلى وتكەن بولاتىن. سول كەزدە ىشىندە شەنەۋنىگى بار، بيزنەسمەنى بار - جالپى 11 ادام ءتۇرلى مەرزىمگە باس بوستاندىعىنان ايىرىلعان بولاتىن. سوت اعايىندى رىسقاليەۆتەرگە قاتىستى سىرتتاي ۇكىم شىعاردى. وعان سايكەس، بەرگەي رىسقاليەۆ 17 جىلعا، ال ونى اعاسى امانجان رىسقاليەۆ 16 جىلعا سوتتالدى.