ۋكراينا پرەزيدەنتتىگىنە كانديدات پۋتينمەن كەلىسسوزگە دايىن ەكەنىن ايتتى
«ۋكراينا» ارناسىنا سۇحبات بەرىپ جاتىپ، «رەسەي ليدەرىمەن كەلىسسوزگە دايىنسىز با؟» دەگەن سۇراققا كانديدات «ءيا» دەپ جاۋاپ بەرگەن.
مۇنان سوڭ زەلەنسكي «ۋكراينا ءوز جەرى مەن ازاماتتارىن ەشقاشان قۇربان ەتپەيتىنىن، ونىڭ اۋماقتىق تۇتاستىعى وزگەرىسسىز قالۋى كەرەگىن» ايتتى. ونىڭ سوزىنشە، كەلىسسوزدەر ديپلوماتيالىق فورماتتا باتىس ەلدەرى وكىلدەرىنىڭ قاتىسۋمەن ءوتۋى ءتيىس.
زەلەنسكيدىڭ پايىمداۋىنشا، باستى مىندەت - «سوعىستى توقتاتۋ عانا ەمەس، ءبىرىنشى قادامدى جاساپ، اتىستى دوعارۋ». ۋكراينا شىعىسىنداعى داۋ تۋرالى ءسوز قوزعاعان كانديدات مينسك پروتسەسىن جالعاستىرۋ كەرەگىن، ءبىراق «ونىڭ فورماتىن قايتا جانداندىرۋ قاجەتىن» ايتتى.
سونداي- اق ۆلاديمير زەلەنسكي «سەپاراتيستەر باقىلاۋىنداعى ءاربىر ۋكراينالىققا كيەۆ پوزيتسياسىن ۇقتىرۋىمىز كەرەك» دەدى.
«سوندا تۇراتىن ازاماتتارعا زەينەتاقى تولەپ، ولاردىڭ الدانىپ قالعانىن، ءبىزدىڭ مۇندا ولاردى كۇتىپ وتىرعانىمىزدى ايتىپ، اتىس توقتاپ، ءبىز جەڭەتىنىمىزدى، باسىپ الىنعان اۋماقتار ۋكراينا قۇرامىنا قايتاتىنىن ايتۋىمىز كەرەك» دەدى زەلەنسكي.
ۋكرايناداعى پرەزيدەنت سايلاۋىنىڭ ءبىرىنشى كەزەڭىنىڭ قورىتىندىسىنا سايكەس، اكتەر ۆلاديمير زەلەنسكي - سايلاۋشىلاردىڭ 30,24 پايىز داۋىسىن، ال پەتر پوروشەنكو 15,95 پايىز داۋىس العان.
پرەزيدەنت سايلاۋىنىڭ ەكىنشى كەزەڭى 21 - ساۋىرگە بەلگىلەنگەن.
