گەرمانيالىق وقۋشىلار تاجىريبە الماسۋ ءۇشىن قازاقستانعا كەلدى
دەپ حابارلايدى قازاقپارات pavlodarnews.kz سايتىنا سىلتەمە جاساپ.
نازاربايەۆ زياتكەرلىك مەكتەبىنىڭ باسپا ءسوز قىزمەتىنەن ءمالىم ەتكەندەي، Goethe Schule Wetzlar مەكتەبىنەن كەلگەن دەلەگاتسيا 5-17 - ءساۋىر ارالىعىندا قازاق ەلىمەن ەتەنە تانىسىپ، وقۋشىلارمەن ۇزدىك حالىقارالىق تاجىريبە الماسۋدى ماقسات ەتىپ وتىر.
«بارلىعىمىز قازاقستانعا العاشقى رەت كەلىپ وتىرمىز. العان اسەرىمىز وتە كەرەمەت. مەكتەپكە كىرە بەرىسىنەن ءبىزدى وقۋشىلار، ۇستازدار وتە جىلى قارسى الدى. وتە قۋانىشتىمىز. الداعى اپتالاردا قالا ومىرىمەن، وسى جەردىڭ مادەنيەتىمەن تانىساتىن بولامىز»، - دەيدى دەلەگاتسيانى باستاپ كەلگەن Goethe Schule Wetzlar مەكتەبىنىڭ شەت ەل تىلدەرى ۇستازى حەلەنا كرامەر.
«سەرىكتەس مەكتەپتەر» باعدارلاماسى اياسىندا جۇزەگە اسىرىلىپ وتىرعان بۇل شارا ەكى ەل اراسىنداعى ءوزارا مادەني ىنتىماقتاستىقتى نىعايتۋعا باعىتتالعان. ءاربىر دەلەگات پاۆلودارلىق وتباسىلاردا ورنىعىپ، قازاقستاندىق جولداستارىنىڭ ءومىر سالتىمەن تانىسپاق. وسۋ ۋاقىتتا مەيماندار وبلىستىڭ كورىكتى جەرلەرىن ارالاپ، نۇر- سۇلتان قالاسىنا ساپار شەگۋدى جوسپارلاپ وتىر.
«مەن گەتە گيمنازياسىنان كەلىپ وتىرمىن. مەنى ەرەكشە قىزىقتىرعانى، مەكتەپتە بيولوگيا، حيميا، فيزيكا جانە ماتەماتيكا سىندى پاندەر اعىلشىن تىلىندە وتكىزىلەتىنى. ءوزىم دە فيزيكا جانە ماتەماتيكا ءپانىنىڭ ۇستازى بولعاندىقتان، الداعى كۇندەرى ءوزارا تاجىريبەمىزبەن الماسىپ، ىنتىماقتاستىعىمىزدى ودان ءارى وربىتەمىز دەپ ويلايمىن»، - دەيدى شليم پاتريك.
ايتا كەتەرلىگى، 2018 -جىلدىڭ ەكىنشى جارتىسىندا مەكتەپتىڭ 15 وقۋشىسى گەتە- ينستيتۋتى ۇيىمداستىرعان بايقاۋدىڭ جەڭىمپازى اتانىپ، «Träume von Deutschland» وقۋشىلار الماسۋ باعدارلاماسى اياسىندا گەرمانياعا ەكى اپتالىق ساپارعا بارىپ كەلگەن بولاتىن.
