بالۋان شولاقتىڭ ناعىز كۇرەسكەر ەكەنىن كورسەتۋگە تىرىستىق - ەركەبۇلان دايىروۆ

None
None
 نۇر- سۇلتان. قازاقپارات - اكتەر ەركەبۇلان دايىروۆ «بالۋان شولاق» فيلمىندە كۇرەسكەر تۇلعانى سومداۋعا قانداي دايىندىقپەن كەلگەنىن ايتىپ بەردى، دەپ حابارلايدى قازاقپارات ءتىلشىسى.

«جالپى ايتار بولساق، بۇل كينو بىزگە نە ءۇشىن كەرەك؟ كينو - يدەولوگيالىق ساياساتتىڭ ۇلكەن ءبىر قارۋى، ۇلتتىق رۋحانياتتى التى قۇرلىققا پاش ەتەتىن جاقسى قۇرال. ءبىزدىڭ سوعان قۇقىمىز بار. جاعدايىمىز دا جەتەدى. قۇداي قالاسا، ءبىراز كۇننەن كەيىن «بالۋان شولاق» فيلمىمەن التى الاش قاۋىشاتىن بولادى. رەجيسسەر نۇرگەلدى سادىعۇلوۆ ايتىپ وتكەندەي، بالۋان شولاقتى كوپ جاستار تانىمايدى. تەك استىندا «ك ف س» ساتاتىن بالۋان شولاق سپورت كەشەنى دەپ قانا بىلەدى. ال شىندىعىندا، بۇل باتىر بىرەۋدى بوز كىلەمدە جىققانىمەن ەمەس، ەلدىڭ نامىسىن، قازاق ونەرىنىڭ جۇگىن ارقالاپ، اتادان بالاعا ميراس بولعان ۇلكەن مۋزىكالىق قۇندىلىق قالدىرعان اردا ازامات ەكەنىن ءبىرى بىلسە، ءبىرى بىلمەيدى. سوندىقتان، بالۋان شولاق تۋرالى تەك سپورت نەمەسە ونەردىڭ توڭىرەگىندە جۇرگەن ادامنىڭ ءبىلۋى شارت ەمەس. بۇنى جالپى حالىق ءبىلۋى كەرەك» ، - دەيدى اكتەر.

ەركەبۇلان دايىروۆتىڭ ايتۋىنا قاراعاندا، كاستينگتەن وتكەننەن كەيىن وعان «ءبىر جىلقىنى ءبىر ءوزىڭ جەۋىڭ كەرەك» دەگەن تالاپ قويىلعان.

«سالماق قوسۋ كەرەك دەدى. ۋاقىت وتە قىسقا - 2 اي عانا قالعان. ءبىر ايدىڭ ىشىندە 15 كەلى سالماق قوستىق. سىرت كەلبەتى - فاكتۋرانى بارىنشا ۇقساتۋعا تىرىستىق. كۇندە سپورتپەن اينالىسىپ، ارنايى جاتتىقتىرۋشىدان ساباق الدىق. وسىنىڭ ءبارى وڭاي دۇنيە ەمەس. بالۋان شولاقتى حالقىمەن قاۋىشتىرۋ ءۇشىن قانداي اكتەر بولسىن، بارىنشا تىرىسار ەدى. ال قالعان قيىندىقتار ەلگە ماڭىزدى ەمەس، وزىمە عانا قاتىستى دۇنيە. تاعى دا قوسا كەتەيىن: بالۋان شولاقتىڭ ءومىرىنىڭ ءاربىر ءساتى - تاريحقا تولى. كەنەن اتامىزبەن كەزدەسىپ، ءبىراز اندەرىن ۇيرەتىپ كەتكەن. ونىڭ ءوزى 45 مينۋتتىق كينو بولار ەدى. سوندىقتان، بۇل كينودا ءرولدى قولدان كەلگەنشە ءساتتى الىپ شىعۋعا تىرىستىق. بالۋان شولاق - ءىستىڭ ادامى. ەل باسىنا كۇن تۋعاندا ەتىگىمەن سۋ كەشكەن ناعىز ەر ازامات. سول سەبەپتى، بالۋان شولاقتىڭ كۇرەسكەر بولعانىن بارىنشا كورسەتۋگە تىرىستىق» ، - دەيدى اكتەر.

ەسكە سالا كەتسەك، بۇعان دەيىن قازاقپارات تىلشىسىنە فيلم رەجيسسەرى نۇرگەلدى سادىعۇلوۆ «بالۋان شولاق» فيلمى قالاي تۇسىرىلگەنىن ايتىپ بەرگەن بولاتىن.

سوڭعى جاڭالىقتار