داعىستاندا «بالۋان شولاق» فيلمى كورسەتىلەدى

 نۇر- سۇلتان. قازاقپارات - قازاقتىڭ حالىق كومپوزيتورى، ات ويىنىنىڭ ءتۇرلى ءتاسىلىن مەڭگەرگەن ونەرپاز، كۇش ونەرىن كورسەتكەن سپورتشىس، جاۋىرىنى جەرگە تيمەگەن بالۋان بالۋان شولاق (نۇرماعانبەت بايمىرزا ۇلى) تۋرالى فيلم داعىستاندا كورسەتىلەتىن بولدى، دەپ حابارلايدى قازاقپارات ءتىلشىسى.

قازاقستاندا «بالۋان شولاق» فيلمى 18 - ساۋىردەن باستاپ پروكاتقا شىعادى.

«جالپى، امەريكا تاراپىمەن كەلىسسوز جۇرگىزىلىپ جاتىر. وسى جاقىندا بەلگىلى بولادى. ءبىز ولارعا ترەيلەردى جىبەرىپ ەدىك، قاتتى ۇناتىپ وتىر. بۇگىن ءبىر- ەكى كۇندە سۋبتيترمەن فيلمنىڭ اعىلشىنشا نۇسقاسىن امەريكاعا جىبەرەمىز. سودان كەيىن جاۋابىن ايتادى. سونىمەن بىرگە، بۇيىرسا، 10 - مامىردان باستاپ فيلم داعىستاننىڭ بەس قالاسىندا كورسەتىلەدى. سونىمەن بىرگە، فيلمدى بەلارۋس، ۋكراينا سەكىلدى مەملەكەتتەردە كورسەتۋدى ماقسات ەتىپ وتىرمىز» ، - دەدى مۇحتار اۋەزوۆ اتىنداعى قازاق مەملەكەتتىك- اكادەميالىق دراما تەاترىنىڭ ديرەكتورى ءسابيت ءابدىحالىقوۆ و ك ق- دا وتكەن باسپا ءسوز ءماسليحاتىندا.

ءوز كەزەگىندە رەجيسسەر نۇرگەلدى سادىعۇلوۆ اتالمىش تۋىندى - بالۋان شولاق بابامىز تۋرالى تۇڭعىش فيلم ەكەنىن ءسوز ەتتى.

«سوندىقتان، وسى فيلمدە بالۋان شولاق بابامىزدىڭ بەينەسىن بارىنشا، قولىمىزدان كەلگەنشە شىنايى كورسەتۋگە تىرىستىق. مەن دەرەكتى فيلمدەردىڭ رەجيسسەرى بولعاندىقتان، ءبىراز جۇمىستار جاسادىم. سەناري اۆتورى - جازۋشى دۋلات يسابەكوۆ. فيلمنىڭ سەناريى م. اۋەزوۆ اتىنداعى تەاتردىڭ «جاۋ جۇرەك» قويىلىمىنىڭ جەلىسىمەن جازىلعان. 1998 -جىلدان باستاپ تەمىربەك جۇرگەنوۆ اتىنداعى ونەر اكادەمياسىندا وقىپ جۇرگەن كەزىمنەن بالۋان شولاقتىڭ ومىرىنە قىزىعۋشىلىق تانىتقىم كەلەدى. دۋلات اعامىزدىڭ پەسالارىن كورىپ، دۋلات اعانىڭ الدىنا بارىپ، باتاسىن الدىم. ول كىسى قولدادى. سول پەسانىڭ جەلىسى بويىنشا سەناري جاسالدى» ، - دەيدى رەجيسسەر.

ەسكە سالا كەتسەك، بۇعان دەيىن قازاقپارات تىلشىسىنە فيلم رەجيسسەرى نۇرگەلدى سادىعۇلوۆ «بالۋان شولاق» فيلمى قالاي تۇسىرىلگەنىن ايتىپ بەرگەن بولاتىن. فيلمىنىڭ ترەيلەرىن مىنا سىلتەمەدەن كورۋگە بولادى.