قازاقستاندىق اسكەريلەر قالاعا شابۋىل جاسالعان جاعدايداعى دايىندىعىن پىسىقتادى
بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.
«ەلدى مەكەنگە شابۋىلداۋ كەزىندەگى باتالوندىق تاكتيكالىق توپ» تاقىرىبىنداعى شارا بارىسىندا جالپى اسكەري جانە دەسانتتىق- شابۋىلداۋ بريگادالارىنىڭ كومانديرلەرىمەن كورسەتپەلى ادىستەمەلىك- نۇسقاۋلىق ساباقتار ءوتتى.
ساباقتاردىڭ باستى ماقساتى شابۋىلداۋ جاساعىنىڭ قۇرامى مەن ىقتيمال تاپسىرمالارىن جەتكىزۋ، كومانديرلەردىڭ ەلدى مەكەنگە شابۋىلداۋعا بولىمشەنىڭ دايىندىعى جونىندە جۇمىس ەرەكشەلىكتەرىن ۇعىنۋى جانە شابۋىلداۋ جاساۋ كەزىندە جەكە قۇرام مەن اسكەري تەحنيكانىڭ ءىس- قيمىلدارىن كورسەتۋ بولدى.
ساباقتار بارىسىندا شابۋىلداۋ جاساعىنىڭ قۇرامىن تاڭداۋ جانە ەلدى مەكەندى بارلاۋ جونىندەگى ماسەلەلەر قارالدى. سونداي- اق ەلدى مەكەنگە شابۋىلداۋ جاساۋ كەزىندە باتالوندىق تاكتيكالىق توپ جەكە قۇرامى مەن اسكەري تەحنيكاسىنىڭ پراكتيكالىق ءىس- قيمىلدارى پىسىقتالدى.
«باتىس» وڭىرلىك قولباسشىلىعى اسكەرلەرىنىڭ قولباسشىسى گەنەرال- مايور قانىش ابۋباكىروۆتىڭ ايتۋىنشا، بۇگىنگى اسكەري قاقتىعىستاردىڭ سيپاتى مەن ۋربانيزاتسيالانۋدىڭ جوعارى دەڭگەيى بولاشاقتا جاۋىنگەرلىك ءىس- قيمىلدار كوبىنەسە قالالىق جەرلەردە وتەتىنىن ۇعىندىرىپ وتىر.
