قوستانايدا استىقتى قايتا وڭدەۋ كاسىپورنى سالىنادى

بۇل تۋرالى اۋىل شارۋاشىلىق تاۋار وندىرۋشىلەرى باس قوسقان ءداستۇرلى اگروكەڭەستە وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆ ايتتى، دەپ حابارلايدى قازاقپارات.

عاۋەز نۇرمۇحامبەتوۆ ايتقانداي، جوسپار بويىنشا 4 ميلليون گەكتارعا ءبيداي ەگىلەدى. سونداي-اق، مايلى داقىلدار القابى 476 مىڭ گەكتارعا ۇلعايدى. ەسكە سالساق، 2018-جىلى ديقاندار 430 مىڭ گەكتارعا مايلى داقىل ەككەن.

«جىل سايىن مايلى داقىلدارعا قاجەتتى القاپتى ۇلعايتۋ ارقىلى ەكسپورت كولەمىن ءبىراز ارتتىردىق. ماسەلەن، وسىدان بەس جىل بۇرىن ونىڭ كولەمى 39 مىڭ توننا بولسا، قازىر 151 مىڭ توننادان اسادى. ءوندىرىستىڭ بۇلاي قارقىن الۋى ءونىمدى قايتا وڭدەيتىن كاسىپورىنداردىڭ جۇمىسىن %13 كە ارتتىردى، ال ەكسپورت كولەمى ءتورت ەسەگە كوبەيدى. وسى جىلى 4,1 مىڭ گەكتار كارتوپ جانە 900 گەكتارعا كوكونىس وتىرعىزىلادى. بۇل دا جاقسى جەتىستىك. ءبىراق، ءالى دە كوبەيتەمىز»، - دەدى وبلىس اكىمىنىڭ ءبىرىنشى ورىنباسارى.

وسىعان بايلانىستى اۋدان، قالا اكىمدەرىنە ەگىستىك جەرلەرىن ءارتاراپتاندىرۋعا كۇش سالىپ، مايلى داقىلدار القابىن ءالى دە ۇلعايتا ءتۇسۋ مىندەتى جۇكتەلدى.

ال وبلىس اكىمى ارحيمەد مۇحامبەتوۆ وتكەن جىلعى وبلىس ديقاندارىنىڭ جۇمىسىن جاقسى باعالادى.

«وسى قارقىننان تايماۋ كەرەك. ەڭ باستىسى ەڭبەك ونىمدىلىگىنە ءمان بەرىڭىزدەر. سول ارقىلى ءونىم ءوندىرۋ كولەمى دە ۇلعايادى. باستى مىندەتىمىز دە وسى بولۋى ءتيىس. بىلتىر وبلىس اۋىل شارۋاشىلىق تاۋار وندىرۋشىلەرى 378 ميلليارد تەڭگەنىڭ ءونىمىن وندىرگەن. قازىر اۋىل شارۋاشىلىعىن سيفرلاندىرۋ ءجۇرىپ جاتىر. وبلىستا ءارتاراپتاندىرۋ بويىنشا قىرۋار جۇمىس اتقارىلۋدا. ءالى دە مايلى داقىلدار القابىن كوبەيتۋدى تاپسىرامىن»، - ءوڭىر باسشىسى.

جيىندا بەلگىلى بولعانداي، وبلىستا سوڭعى ۇلگىدەگى جابدىقتارمەن جاراقتاندىرىلعان قايتا وڭدەۋ كاسىپورنى اشىلاتىنى بەلگىلى بولدى. جوبا قۇنى - 300 ميلليون دوللار. وندا 150 مىڭ تونناعا دەيىن مايلى داقىلدار وڭدەلەدى.