جانكەنت يۋنەسكو-نىڭ مادەني مۇرالار تىزىمىنە ەنگىزىلەدى

None
None
 قىزىلوردا. قازاقپارات - قىزىلوردا وبلىسى قازالى اۋدانى اۋماعىنداعى جانكەنت قالاشىعى يۋنەسكو- نىڭ مادەني مۇرالار تىزىمىنە ەنگىزىلەدى، دەپ حابارلايدى قازاقپارات ءتىلشىسى.

 بۇل تۋرالى وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى ميرا ءابۋوۆا قازالى اۋدانىنىڭ اكىمدىگىندە  قىزىلوردا وبلىسى بويىنشا تاريحي- مادەني مۇرالاردى پايدالانۋ مەن قورعاۋدىڭ جاي- كۇيى جانە ونى جاقسارتۋ شارالارى كەڭەسىندە ايتتى.

 جانكەنت رەسپۋبليكالىق سيپاتتاعى ارحەولوگيالىق ەسكەرتكىش بولىپ تابىلادى. ول قازالى اۋدانى اۋماعىنداعى وركەندەۋ اۋىلدىق وكرۋگىنىڭ ورتالىعىنا ىرگەلەس جاتىر. تاريحشىلاردىڭ ايتۋىنشا، كونە شاھار VІІ-ХІV عاسىرلاردا جانكەنت، يانگيكەنت قالاسى دەگەن اتاۋمەن ءومىر سۇرگەن.

تۇرىكمەن تاريحشىسى ابۇلعازى ءباھادۇر جانكەنتتىڭ جۇزدەگەن جىل وعىز ەلىنە استانا بولىپ كەلگەنىن ايتادى. وعىزدار سول اۋماقتى ەرتە زاماننان مەكەندەگەن. ەل بيلەگەن پاتشالارى استانا ەسانالعان جانكەنتتە ءومىر سۇرگەن. اتالمىش شاھار سىر وزەنىنىڭ سول جاق بەتىندە ورىن تەپكەن,. ول اۋدان ورتالىعى - ايتەكە بي كەنتىنەن 15-20 شاقىرىم جەردە ورنالاسقان.

سونداي-اق، قازاق حالقىنىڭ ومىرىندە ماڭىزدى سانالاتىن سىعاناق قالاشىعى دا يۋنەسكو-نىڭ قورعاۋىنا الىناتىن مادەني مۇرالار تىزىمىنە ەنگىزىلەدى دەپ جوسپارلانىپ وتىر.

ايتا كەتەرلىگى، بىلتىر قاراشا ايىندا «قورقىت اتا» مۇراسى يۋنەسكو- نىڭ ماتەريالدىق ەمەس مۇرالارى تىزىمىنە ەنگەن بولاتىن.

سوڭعى جاڭالىقتار