ەلىمىزدە دومبىرا پىشىنىندەگى العاشقى فونتان ىسكە قوسىلادى

الماتى. قازاقپارات - الماتىدا قۇرمانعازى اتىنداعى قازاق ۇلتتىق كونسەرۆاتورياسىنىڭ اۋماعىندا دومبىرا پىشىنىندەگى سۋبۇرقاق پايدا بولدى.

بۇل تۋرالى ق ر  مادەنيەت جانە سپورت مينيسترلىگىنەن ءمالىم ەتتى، دەپ حابارلايدى قازاقپارات.

«فونتاننىڭ دومبىرا پىشىندە بولۋى بەكەر ەمەس. سەبەبى دومبىرا قازاقتىڭ مۋزىكالىق مادەنيەتىندەگى شوقتىعى بيىك اسپاپ بولىپ تابىلادى. ىقىلىم زامانداردان وسى كۇنگە دەيىن حالىقپەن بىرگە جاساسىپ كەلە جاتقان، ءداستۇرلى رەپەرتۋارى ەڭ باي اسپاپ. قازاق دومبىرامەن قۋانىشىن دا، قايعىسىن دا ءبولىسىپ، تاريح-شەجىرەسىن بايانداپ، كوڭىل-كۇي مەن ىشكى جان تەبىرەنىسىن جەتكىزگەن. دومبىرا قازاق حالقىنىڭ ۇلتتىق برەندى بولىپ سانالادى. «رۋحاني جاڭعىرۋ» باعدارلاماسى اياسىندا اتقارىلعان جوبالار بويىنشا بۇل اسپاپ ۇلتتىق قۇندىلىقتارىمىزدى دارىپتەۋدىڭ ەڭ ۇلكەن قۇرالىنا اينالىپ، الەمگە قازاق ونەرىن تانىتۋدا ۇلكەن ءرول اتقارىپ كەلەدى»، - دەپ اتاپ ءوتتى مينيسترلىكتىڭ باسپا ءسوز قىزمەتىنەن.

دومبىرا پىشىنىندەگى سۋبۇرقاق كونسەرۆاتوريانىڭ ۇلكەن كونسەرت زالى الدىنداعى الاڭقايدا، قۇرمانعازى ەسكەرتكىشى جانىندا سالىندى. جوبا اۆتورلارىنىڭ ويىنشا ارت-نىسان ۇلى كۇيشىنىڭ اتىن يەلەنگەن ەلىمىزدەگى ەڭ كونە وقۋ ورىندارىنىڭ ءبىرى سانالاتىن ونەر ورداسىنا كورىك بەرمەك.

فونتاننىڭ ۇزىندىعى - 10,25 مەتر، ەنى - 2,85 مەتر. جوعارى قىسىممەن جۇمىس ىستەيتىن زاماناۋي سورعىلارمەن جابدىقتالعان. دومبىرانى 40-قا جۋىق شام جارىقتاندىرىپ تۇرادى. تۋىندىنىڭ اۆتورلارى - ن. ا. قانىبەكوۆ جانە ن. ن. قۋانىشبەكوۆ.

جاڭا نىسان فونتاندار كۇنى، ياعني 25- مامىردا ىسكە قوسىلاتىن بولادى.

ەسكە سالايىق، ق ر تۇڭعىش پرەزيدەنتى نۇرسۇلتان نازاربايەۆتىڭ 2018-جىلدىڭ 13- ماۋسىمىنداعى قاۋلىسىمەن ۇلتتىق دومبىرا كۇنى بەكىتىلگەن بولاتىن. مەرەكە شىلدە ايىنىڭ ءبىرىنشى جەكسەنبىسىندە اتاپ وتىلەدى. بۇدان بولەك، دومبىرادا قازاقتىڭ ءداستۇرلى كۇيلەرىن ورىنداۋ ونەرى يۋنەسكونىڭ ماتەريالدىق ەمەس مادەني مۇرالارى تىزىمىنە ەنگەنىن اتاپ وتەيىك.