ديماش قۇدايبەرگەن جايلى دەرەكتى فيلم ءتۇسىرىلىپ جاتىر
بۇل تۋرالى تەلەارنانىڭ باسقارما ءتوراعاسى ەرلان قارين ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ايتتى، دەپ حابارلايدى قازاقپارات ءتىلشىسى.
«ديماشتىڭ نۇر-سۇلتاندا وتەتىن كونسەرتىنەن باسقا تاعى ءبىر جوبامىز - ءانشى تۋرالى دەرەكتى فيلم. ول جونىندە ءبىز ءبىر ۋاقىتتا كەلىستىك. وتكەن جىلى ديماشتىڭ كونسەرتىن ۇيىمداستىرۋ جونىندە اقىلداسىپ جاتقان ۋاقىتتا، دەرەكتى فيلم تۇسىرسەك دەگەن ۇسىنىس ايتقان ەدىك. ونىڭ شىعارماشىلىعىنا قىزىعۋشىلىق وتە ۇلكەن»، - دەدى «قازاقستان» ر ت ر ك» ا ق باسشىسى ەرلان قارين.
ونىڭ ايتۋىنشا، ءانشىنىڭ كەلىسىمىن العاننان كەيىن شاعىن شىعارماشىلىق توپ جۇمىسقا كىرىسىپ كەتكەن.
«بۇل فيلمدە بۇرىن جاريالانباعان ءتۇرلى بەينەماتەريالدار كورسەتىلەتىن بولادى. وعان دايىندىق بارىسىندا ءبىزدىڭ كوماندا ءانشىنىڭ ماسكەۋدەگى كونسەرتىنە باردى. ارىپتەستەرىمەن ارنايى سۇحباتتار ءتۇسىردى. ماسكەۋدەگى كونسەرتىنەن كەيىن قىتايعا ساپارعا اتتانىپ، حۋنان ارناسىنداعى ۇلكەن شوۋعا قاتىستى. ءبىز شوۋدىڭ تۇسىرىلىمىنە دە قاتىسىپ، ول جاقتا دا قىتايداعى دوستارى مەن ارىپتەستەرى تاراپىنان سۇحباتتاردى تۇسىردىك. ارينە، نەگىزگى ءتۇسىرىلىم نۇر-سۇلتاندا 29- ماۋسىمدا وتەتىن كونسەرتىنە بايلانىستى بولدى. وقيعا جەلىسى وسىنىڭ نەگىزىندە قۇرىلادى. بۇل - ديماشتىڭ ەڭ ۇلكەن كونسەرتى. البەتتە، ديماشتىڭ الەمنىڭ ءار تۇكپىرىندە كونسەرتى ءوتىپ جاتىر. ءبىراق، بۇل ەڭ اۋقىمدى كونسەرتى بولادى دەپ ويلاپ وتىرمىز»، - دەيدى ەرلان قارين.
«قازاقستان» تەلەارناسىنىڭ باسقارما ءتوراعاسى دەرەكتى فيلم كۇزدە كورسەتىلەتىنىن حابارلادى.
ەسكە سالا كەتسەك، اتالمىش باسپا ءسوز ءماسليحاتىندا ەرلان قارين ديماش قۇدايبەرگەننىڭ ەلوردادا وتەتىن جەكە كونسەرتىنە بيلەتتەردىڭ 70 پايىزى ساتىلىپ كەتكەنىن حابارلاعان بولاتىن.
