فۋتبول: «استانا» ءتورت ويىندا قاتارىنان جەڭىسكە جەتتى

None
None
نۇر-سۇلتان. قازاقپارات - كەشە ەلوردالىق «استانا» ءوز الاڭىندا «اتىراۋ» كومانداسىن قابىلدادى. بۇل فۋتبولدان پرەمەر-ليگا كوماندالارى اراسىنداعى قازاقستان بىرىنشىلىگىنىڭ الدىن-الا وتكىزىلىپ جاتقان 18-تۋر ويىنى بولاتىن، دەپ حابارلايدى قازاقپارات ءتىلشىسى.

«استانا» بيىلعى بىرىنشىلىكتى ءساتتى باستادى. بۇعان دەيىن ءۇش كەزدەسۋدە ۇپايدان شاشاۋ شىعارعان جوق. الدىمەن 10- ناۋرىزدا ءوز الاڭىندا «اقتوبەنى» 4:1 ەسەبىمەن جەڭسە، ودان كەيىن 15- ناۋرىزدا ەلوردادا كوكشەتاۋدىڭ «وقجەتپەسىن» 2:1 ەسەبىمەن تىزە بۇكتىردى. ال 31- ناۋرىزدا تالدىقورعاندا جەرگىلىكتى «جەتىسۋدان» 2:1 ەسەبىمەن باسىم ءتۇستى. ناتيجەسىندە ءۇش تۋردا ۇپاي جوعالتپاعان «توبىل» مەن «قايراتتىڭ» قاتارىنا قوسىلدى.

«اتىراۋ» كومانداسى العاشقى تۋردا قىزىلوردادا جەرگىلىكتى «قايساردى» 1:0 ەسەبىمەن جەڭدى. ودان كەيىن «ەرتىسكە» 1:3، «تارازعا» 0:2 ەسەبىمەن جول بەردى. قازىر تۋرنير كەستەسىندە توعىزىنشى ورىندا كەلەدى.

بۇگىنگى كەزدەسۋدە «استانا» كومانداسىنىڭ باسىم ەكەنى بايقالىپ تۇردى. ويىن تىزگىنى نەگىزىنەن الاڭ يەلەرىنىڭ قولىندا بولدى. العاشقى گول 17-مينۋتتا سوعىلدى. استانالىق مارين توماسوۆتىڭ الىستان تەپكەن دوبى «اتىراۋ» قاقپاسىنىڭ جاقتاۋىنا ءتيىپ كەيىن سەرپىلدى. وعان ەلوردالىق شابۋىلشى دجۋنيور كابانانگا ءبىرىنشى جەتىپ، گولعا اينالدىرىپ ۇلگەردى. ال ەكىنشى گولدى 40-مينۋتتا دورين روتاريۋ ءوز ەنشىسىنە جازدى.

ەكىنشى كەزەڭدە دە «استانا» قارقىنىن باسەڭدەتكەن جوق. كەزەكتى شابۋىلدىڭ بىرىندە 50-مينۋتتا ابزال بەيسەبەكوۆ ەسەپتى ۇلعايتا ءتۇستى. ويىننىڭ 83-مينۋتىندا «اتىراۋ» ەسەپ ايىرماسىن قىسقارتا الدى. ارىپتەسى رودينوۆتىڭ بەرگەن پاسىن رينات جۇماتوۆ گولعا اينالدىردى. كەزدەسۋدە «استانا» 3:1 ەسەبىمەن جەڭدى. وسىلايشا ولار ءتورتىنشى ويىن قاتارىنان جەڭىسكە جەتتى. تۋرنير كەستەسىندە ەلوردالىق كلۋب جەكە-دارا كوش باسىنا شىقتى.

ەندى ءتورتىنشى تۋر ويىندارى 6- جانە 7- ءساۋىر كۇندەرى بولادى. 6- ساۋىردە «توبىل» مەن «اقتوبە»، «ورداباسى» مەن «جەتىسۋ»، «قايسار» مەن «استانا»، «قايرات» پەن «وقجەتپەس»، «ەرتىس» پەن «تاراز» كوماندالارى كەزدەسسە، 7- ساۋىردە «اتىراۋ» مەن «شاحتەر» كلۋبتارى شەبەرلىك بايقاسادى.

سوڭعى جاڭالىقتار