قازاقستاندا رەسەيمەن بىرلەسكەن كووپەراتسيا باعدارلاماسى اياسىندا ءبىرقاتار باعدارلاما جۇزەگە اسىرىلادى

None
None
نۇر-سۇلتان. قازاقپارات - ق ر پرەزيدەنتى قاسىم-جومارت توقايەۆتىڭ رەسەيگە رەسمي ساپارى بارىسىندا تاراپتار ءبىرقاتار ماڭىزدى قۇجاتقا قول قويدى، دەپ حابارلايدى قازاقپارات ءتىلشىسى.

اتاپ ايتقاندا، رەسەيلىك-قازاقستاندىق كووپەراتسيا اياسىندا بىرلەسكەن ءىس-قيمىل جوسپارى، قازاقستان رەسپۋبليكاسى ۇكىمەتى مەن رەسەي فەدەراتسياسى ۇكىمەتى اراسىندا «بايقوڭىر» كەشەنىن گازبەن جابدىقتاۋ جونىندەگى كەلىسىم، ق ر سيفرلىق دامۋ، قورعانىس جانە اەروعارىش ونەركاسىبى مينيسترلىگى مەن ر ف ونەركاسىپ جانە ساۋدا مينيسترلىگى اراسىندا وندىرىستىك جانە عىلىمي-تەحنيكالىق كووپەراتسيا كاسىپورنى سالاسىنداعى ىنتىماقتاستىق تۋرالى ەكىجاقتى جوسپار راسىمدەلدى.

قازاقستاندىق جۋرناليستەرگە سۇحبات بەرگەن ق ر يندۋستريا جانە ينفراقۇرىلىمدىق دامۋ ءمينيسترى رومان سكلياردىڭ ايتۋىنشا، ق ر يندۋستريا جانە ينفراقۇرىلىمدىق دامۋ مينيسترلىگى مەن ر ف ونەركاسىپ جانە ساۋدا مينيسترلىگى اراسىندا قول قويىلعان ونەركاسىپتىك كووپەراتسيانى دامىتۋدىڭ بىرلەسكەن ءىس-قيمىل جوسپارى نەگىزىنەن ماشينا جاساۋ سالاسىنا قاتىستى.

«ماشينا جاساۋ ونىمدەرىن جانە ەلدەرىمىزدىڭ اۋماعىندا شىعارىلاتىن ونىمدەردى وقشاۋلاۋ بويىنشا بەلسەندى جۇمىس جۇرگىزۋ قاجەت ەكەندىگىن تۇسىنەمىز. ول كاسىپورىندارىمىز ءۇشىن دەربەس قۇزىرەتتىلىك پايدا بولۋى تۇرعىسىنان ماڭىزدى جانە وزگە دە سالالارعا تارالاتىن بولادى. سوندىقتان رەسەيلىك سەرىكتەسپەن جانە جارتىلاي ءبىزدىڭ ەلدىڭ كومانياسىمەن بىرگە «كاماز»، «كيروۆەتس» ۇلكەن تراكتورىن شىعاراتىن پەتەربور تراكتور زاۋىتى سىندى كاسىپورىندارعا بولشەكتەر جەتكىزۋ تۋرالى شەشىم قابىلداندى»، - دەدى مينيستر.

ونىڭ اتاپ وتۋىنشە، بۇگىن قول قويىلعان جول كارتاسى اشىق سيپاتقا يە جانە ونەركاسىپتىك كووپەراتسياعا قاتىسۋعا نيەت تانىتقان وزگە دە ءتۇرلى كاسىپورىندارمەن تولىعىپ وتىراتىن بولادى.

«بۇل باعدارلامانىڭ ۋاقىتى وتە تىعىز. اعىمداعى جىلدىڭ وزىندە ەلىمىزدىڭ قوستاناي، نۇر-سۇلتان، شىمكەنت جانە وزگە دە قالالارىندا ءبىرقاتار جوبا ىسكە قوسىلاتىن بولادى. ءبىز وعان ۇلكەن سەنىم ارتىپ وتىرمىز. ول كەزىندە ەلدەرىمىزدىڭ اراسىندا بولعان ونەركاسىپتىك كووپەراتسيانى قايتا جاڭعىرتۋعا سەپتىگىن تيگىزەدى دەپ ۇمىتتەنەمىز»، - دەدى ر. سكليار.

سوڭعى جاڭالىقتار