ساراپشى ق ر پرەزيدەنتىنىڭ ماسكەۋگە ساپارىنا قاتىستى پىكىر ءبىلدىردى

ماسكەۋ. قازاقپارات - بۇگىن قازاقستان رەسپۋبليكاسىنىڭ پرەزيدەنتى قاسىم- جومارت توقايەۆ ماسكەۋگە رەسمي ساپارمەن بارادى. ساپار اياسىندا مەملەكەت باسشىسى رەسەي فەدەراتسياسىنىڭ پرەزيدەنتى ۆلاديمير پۋتينمەن كەلىسسوز جۇرگىزەدى، دەپ حابارلايدى قازاقپارات ءتىلشىسى.

 قازاقستان مەن رەسەي كوشباسشىلارىنىڭ كەزدەسۋى بارىسىندا ساياسي، ساۋدا- ەكونوميكالىق، مادەني- گۋمانيتارلىق سالالارداعى ەكىجاقتى ىنتىماقتاستىق ماسەلەلەرى، سونداي- اق وزەكتى ايماقتىق جانە حالىقارالىق تاقىرىپتار تالقىعا تۇسپەك. ساپار قورىتىندىسىندا ءبىرقاتار ەكىجاقتى قۇجاتقا قول قويىلاتىندىعى جوسپارلانعان.

وسى ورايدا رەسەيلىك ساراپشى، ساياساتتانۋشى، وڭىرلىك پروبلەمالار ينستيتۋتىنىڭ ديرەكتورى دميتريي جۋراۆليەۆ قازاقستاندىق جۋرناليستەرگە بەرگەن سۇحباتىندا قازاقستان پرەزيدەنتى ق. توقايەۆتىڭ ساپارىنا رەسەي تاراپى قانداي ءمان بەرەتىندىگىن جانە نە كۇتەتىندىگىن ايتىپ بەردى.

«قازاقستاننىڭ جاڭادان تاعايىندالعان پرەزيدەنتى ءوزىنىڭ ءبىرىنشى رەسمي ساپارىن رەسەيگە جاساۋى ر ف مەن ق ر اراسىنداعى ايرىقشا قارىم- قاتىناسقا جانە ەكى ەلدىڭ تىعىز ىنتىماقتاستىعىنا بايلانىستى. كەز كەلگەن ەلدىڭ جاڭا باسشىسى ساپارىن ءوز مەملەكەتىنە ماڭىزى زور ەلدەن باستاپ وتىرادى. وسىعان وراي ەگەر قازاقستان پرەزيدەنتى العاشقى ساپارىن رەسەيدەن باستاسا، دەمەك قازاقستان ءۇشىن رەسەي ماڭىزدى سەرىكتەس سانالادى»، - دەدى د. جۋراۆليەۆ.

ساراپشىنىڭ اتاپ وتۋىنشە، رەسەيلىك تاراپ قازاقستاننىڭ جاڭادان سايلانعان پرەزيدەنتى ق. توقايەۆپەن ق ر تۇڭعىش پرەزيدەنتى نۇرسۇلتان نازاربايەۆ نەگىزىن قالاعان ستراتەگيالىق باعىتتى جالعاستىرۋعا مۇددەلىك تانىتادى جانە قازاقستاننىڭ جاڭا كوشباسشىسىمەن جاڭا جاعدايدا ەكى ەلدىڭ ستراتەگيالىق سەرىكتەستىگى مەن ىنتىماقتاستىعىن نىعايتۋدى قالايدى.

«قازاقستاننىڭ تۇڭعشى پرەزيدەنتى نۇرسۇلتان نازاربايەۆتىڭ ماڭىزى مەن ءرولى رەسەي ءۇشىن وتە ۇلكەن جانە ودان «كەيىن» نە بولاتىندىعى اسا ماڭىزدى. مىنە سول «كەيىن» ءسات كەلىپ وتىر. سوندىقتان ءبىز ءۇشىن بۇل ساپاردىڭ «كەيىننەن» كەيىن «ەرتەڭنىڭ» بولاتىندىعىن قۋاتتاۋى ماڭىزدى. قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ وسىدان 25 جىل بۇرىن ماسكەۋ مەملەكەتتىك ۋنيۆەرسيتەتىندە جاريا ەتكەن سترتاگيالىق باعىتىن - ەۋرازيالىق ينتەگراتسيانى دامىتۋ باعىتىن جالعاستىرا الاتىندىعىنا سەنىمىم مول»، - دەدى رەسەيلىك ساراپشى.

سونىمەن قاتار، رەسەيلىك ساراپشى قازاقستاننىڭ قازىرگى حالىقارالىق قاتىناستارداعى ايرىقشا ورنىنا دا باسا نازار اۋدارىپ ءوتتى.

«ونىڭ ماڭىزىن ⅩⅩ عاسىرداعى اۆستريانىڭ رولىمەن سالىستىرار ەدىم. بۇگىندە قازاقستان الەمدىك اۋقىمدا ءدال سونداي رولگە يە بولىپ وتىر. قازاقستان ءبىر مەزەتتە ا ق ش، ۇلى بريتانيا، رەسەي جانە اراب ەلدەرى سەنىم ارتاتىن ەل بولىپ وتىر. قازاقستان بۇل سەنىم كرەديتىن ىزگى ماقساتتارعا، ەۋرازياداعى، جالپى الەمدەگى ءتارتىپتى ورناتۋعا جۇمساپ وتىر»، - دەدى د. جۋراۆليەۆ.

وسى ورايدا ساياساتتانۋشى قازاقستان رەسەي مەن وزگە ەلدەردىڭ قارىم- قاتىناسىن دامىتۋدا كوپىر دە بولا الاتىندىعىن باسا ايتتى.

«قازاقستان وزگە ەلدەرمەن رەسەيدىڭ اراسىندا كوپىر دە بولا الادى. ماسەلەن، قازىرگى ۋاقىتتا رەسەيدىڭ امەريكا قۇراما شتاتتارىمەن قارىم- قاتىناسى جاقسى ەمەس ەكەندىگى بەلگىلى. سوندىقتان بۇل ۆەكتوردا قازاقستاننىڭ رەسەي ءۇشىن كوپىر بولا الاتىندىعى ءسوزسىز. كۇن تارتىبىنە ءالى تۇسە قويماعا اۋعان پروبلەماسى دا بار. ونى قازاقستاننىڭ قاتىسۋىنسىز شەشۋ ءشۇبا كەلتىرەدى»، - دەدى ول.

اۆتور: مەدەت احمەتوۆ