گەرمانيادا ءيت قۇقى زاڭمەن قورعالعان

وسىلايشا گەرمانيادا ءۇي جانۋارلارىن قاتتى قۇرمەتتەيدى. ءتىپتى كونستيتۋتسيادا ولاردى قورعاۋ تۋرالى ارنايى زاڭ بار. گەرمانيا تۇرعىندارى كوشەدە يەسىز جۇرگەن ءيتتى كورسە، بىردەن پوليتسياعا نەمەسە جانۋارلاردى قورعاۋ ورتالىعىنىڭ قىزمەتكەرلەرىنە حابارلاسادى.

بۇگىندە گەرمانيادا مۇنداي جۇزدەگەن جانۋارلار تۇراعى بار. سونىڭ ءبىرى -  بەرليندىك تيرحايم. اۋماعى جاعىنان ەۋروپاداعى ەڭ ۇلكەن ورتالىق. 22 فۋتبول الاڭىن قۇرايدى. قازىرگى تاڭدا مۇندا 1400 جانۋار بار. ولاردىڭ اراسىندا مىسىق، يتتەر، قويان، ءتىپتى ەكزوتيكالىق رەپتيليالار بار.

 بەاتە كامينسكي، يەسىز جانۋارلاردى قابىلداۋ ورتالىعىنىڭ باسپا ءسوز حاتشىسى:

 -  ءبىز جانۋارلاردى تاربيەلەپ، ولارعا قامقور بولامىز. ورتالىقتا ۇلكەن زاماناۋي كلينيكا بار. وندا اۋىرىپ قالعان ءتورت اياقتىلاردى ەمدەيمىز. سونداي- اق ساۋىقتىرۋ بولىمشەسى دە بار. كەشەن 18 عيماراتتان تۇرادى. جاڭا يەسىن تاپقاندا ءاربىر جانۋارعا قامقورلىق تانىتامىز.

بەرليندىك يەسىز قالعان جانۋارلاردى قابىلداۋ ورتالىعىن ءتۇرلى قايىرىمدىلىق قورلارى قارجىلاندىرادى. جىلدىق بيۋدجەت 8 ميلليون ەۋرونى قۇرايدى. قىزمەتكەرلەردىڭ ايتۋىنشا، بۇل قاراجات ءدارى- دارمەك پەن جانۋارلاردىڭ تاماعىنا جۇمسالادى.

 بەاتە كامينسكي، يەسىز جانۋارلاردى قابىلداۋ ورتالىعىنىڭ باسپا ءسوز حاتشىسى:

-  ورتالىق قايىرىمدىلىقتىڭ ارقاسىندا جۇمىس ىستەپ تۇر. كومەك قولىن سوزعىسى كەلەتىن ءاربىر ادام ءۇشىن ەسىگىمىز اشىق. 170 شتاتتاعى قىزمەتكەرلەرىمىزدەن بولەك، بىرنەشە جۇزدەگەن ەرىكتىمىز بار. ولار دا كومەكتەسىپ تۇرادى.

 ورتالىقتا جانۋارلار ءۇشىن بارلىق جاعداي جاسالعان. گەرمانيادا قانعىباس يتتەر بولماعانىمەن، پاناسىز جۇرگەن مىسىقتار كوپ. ساراپشىلاردىڭ ايتۋىنشا ءبىر عانا بەرليندە ولاردىڭ سانى 10 مىڭنان اسىپ جىعىلادى. جانۋارلاردى قورعاۋشىلار كۇندەلىكتى ولارعا تەگىن تاماق تاراتادى.

 بەاتە كامينسكي، يەسىز جانۋارلاردى قابىلداۋ ورتالىعىنىڭ باسپا ءسوز حاتشىسى:

 -  كوشەدە كوبىنەسە يەلەرىنەن قاشىپ كەتكەن نەمەسە ۇيلەرىنەن قۋىلعان مىسىقتار جۇرەدى. قولىمىزدان كەلگەنشە ولاردى تاماقتاندىرىپ تۇرامىز. جابايى بولعاندىقتان، ولارعا يە ىزدەپ تابۋدا قيىن. سول سەبەپتى باقىلاپ، كوبەيىپ كەتپەۋىن قادالايمىز.

بەرليندىك جانۋارلار ورتالىعىندا جىل سايىن ءۇش مىڭ جانۋار وزىنە يەسىن تابادى. اسىراپ الۋ ۇدەرىسىنە وتە جاۋاپكەرشىلىكپەن قارايدى. ەگەر وزىڭىزگە جانۋار العىڭىز كەلسە، مىنەزىڭىز جايلى تولىق اقپاراتپەن ءبولىسۋىڭىز كەرەك. سونداي- اق كۇن ءتارتىبىڭىز، ءۇيدىڭ اۋماعى جايلى مالىمەتتەر ۇسىناسىز. ورتالىق قىزمەتكەرلەرىنىڭ ايتۋىنشا، مۇنداي فاكتورلار ادام مەن ءتورت اياقتىلار اراسىندا دوستىق ورناتۋدا سەپتىگىن تيگىزەتىن كورىنەدى.

www.24.kz