ايسۇلتان سەيىتوۆ قازاقستاننىڭ ەڭ اسەم جەرلەرىن كۇللى الەمگە پاش ەتتى

 نۇر-سۇلتان. قازاقپارات - وتاندىق تانىمال رەجيسسەر ايسۇلتان سەيىتوۆ قازاقستان جايلى ەرەكشە ۆيدەو ءتۇسىردى.

جەلىگە جاريالانعان بەينەجازبا بىردەن حالىقتىڭ قوشەمەتىنە يە بولعان.

ەلىمىزدىڭ ەڭ اسەم جەرلەرىن بارىنشا قامتۋعا تىرىسقان جاس دارىننىڭ تۋىندىسى كوپشىلىكتىڭ كوڭىلىنەن شىققان كورىنەدى دەپ جازادى KAZ. NUR. KZ.

الەمدىك جۇلدىزدارعا بەينەبايان ءتۇسىرىپ جۇرگەن قازاقستاندىق رەجيسسەر ءوز ەلىنە ەرەكشە تارتۋ جاساپ، بارشا وتانداستارىن قۋانتقان.

ايسۇلتان سەيىتوۆ قازاقستاننىڭ ەڭ كورىكتى جەرلەرىنىڭ كورىنىسىن قازاقي ناقىشتاعى رۋحتى اۋەنمەن تولىقتىرعان.

ايتا كەتەرلىگى، ۆيدەودا باستى كەيىپكەرلەر رەتىندە الەمگە «#Followmeto» جوباسىن سىيلاعان تانىمال جۇپ مۋراد جانە ناتاشا وسمان بوي كورسەتتى. جەر شارىن شارلاپ، ءوز ساياحاتتارىمەن كوپشىلىكپەن بولىسەتىن جۇبايلار قازاقستانعا ات باسىن بۇرۋىنا وتاندىق رەجيسسەر سەبەپكەر بولعان.

ايسۇلتان سەيىتوۆ وزىمەن بىرنەشە جىل بويى جۇمىس ىستەپ كەلە جاتقان جۇپقا ەلىمىزدىڭ ەڭ اسەم ءارى تاريحي جەرلەرىن كورسەتكەن.

«مەن قازاقستاننىڭ ادەمىلىگىنە تاعى دا ءبىر مارتە ءتانتى بولدىم. مەن بۇل جوبامەن جانە ءوز ەلىمدى قالىڭ كوپشىلىككە تانىتقانىمدى ماقتان تۇتامىن. بۇل قازىرگى تاڭدا مەن ءۇشىن اسا ەرەكشە. سەبەبى، باسقا ەلدە تۇرىپ جاتقاندىقتان، تۋعان جەرىڭە دەگەن ساعىنىش ارتا تۇسەدى. بۇل ۆيدەونى الەم بويىنشا بارىنشا كوپ ادام تاماشالاسا دەيمىن»، - دەپ اعىنان جارىلدى سەيىتوۆ.

انىقتالعانداي، ءتۇسىرىلىم مەملەكەت پەن جەرگىلىكتى ۇيىمداردىڭ كومەگىنسىز، رەجيسسەردىڭ كومانداسىمەن جۇزەگە اسقان.