ەلوردا ۆوكزالىن «نۇر- سۇلتان تەمىرجول ۆوكزالى» ەتىپ وزگەرتۋ ۇسىنىلدى
ق ر پرەمەر- ءمينيسترى اسقار ماميننىڭ ءتيىستى قاۋلى جوباسى ق ر يندۋستريا جانە ينفراقۇرىلىمدىق دامۋ مينيسترلىگىنىڭ رەسمي سايتىندا جاريالاندى.
«استانا تەمىرجول ۆوكزالى «نۇر- سۇلتان تەمىرجول ۆوكزالى» بولىپ قايتا اتالسىن»، - دەلىنگەن قاۋلى جوباسىندا. سونداي- اق قۇجاتقا قول قويىلعان جاعدايدا ول العاشقى رەسمي جاريالانعان كۇننەن باستاپ كۇشىنە ەنەتىنى جازىلعان. ايتا كەتەيىك، قاۋلى جوباسى 2019 -جىلدىڭ 16 - ساۋىرىنە دەيىن «اشىق نورماتيۆتىك- قۇقىقتىق اكتىلەر» پورتالىندا قوعامدىق تالقىلاۋعا ۇسىنىلدى. وندا كەز كەلگەن تۇرعىن ءوز پىكىرىن قالدىرا الادى.
ق ر يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنە سايكەس، تەمىرجول ۆوكزالىنىڭ اتاۋىن وزگەرتۋ مەملەكەتتىك بيۋدجەتتەن قارجىلىق شىعىندى تالاپ ەتپەيدى جانە تەرىس الەۋمەتتىك- ەكونوميكالىق نەمەسە قۇقىقتىق سالدارعا اكەپ سوقتىرمايدى. سونىمەن قاتار ۇسىنىلعان جوبا قابىلدانعان جاعدايدا زاڭناماعا وزگەرىستەر ەنگىزۋ قاجەت ەتىلمەيدى.
ەسكە سالا كەتسەك، 2019 -جىلدىڭ 23 - ناۋرىزى كۇنى قازاقستان رەسپۋبليكاسىنىڭ ەلورداسى استانا قالاسى - نۇر- سۇلتان قالاسى بولىپ قايتا اتالدى. جارلىققا قازاقستان پرەزيدەنتى قاسىم- جومارت توقايەۆ قول قويدى.
اۆتور: ايجان سەرىكجان قىزى