الجيردەگى جاپپاي ەرەۋىلدەن سوڭ پرەزيدەنت بۋتەفليكا وتستاۆكاعا كەتتى
بۇل تۋرالى ەلدىڭ مەملەكەتتىك اگەنتتىگى حابارلادى.
پرەزيدەنت وتستاۆكاسى تۋرالى حابار الجير ارمياسى باس شتابىنىڭ باسشىسى احمەد گاەد سالاح ەل پرەزيدەنتىن بيلىكتەن دەرەۋ كەتىرۋگە شاقىرعاننان سوڭ پايدا بولدى.
اسكەريلەر «پرەزيدەنت بۋتەفليكا بيلىكتەگى ءتورتىنشى مەرزىمى اياقتالعانعا دەيىن، 28 - ساۋىرگە دەيىن قىزمەتىنەن كەتەدى» دەگەن مالىمدەمەگە نارازى بولعان.
الجير كونستيتۋتسياسىنا سايكەس، بۋتەفليكا قىزمەتىنەن كەتكەننەن كەيىن پارلامەنتتىڭ جوعارعى پالاتاسىنىڭ سپيكەرى ابدەلكادەر بەنسالاح مەملەكەتتى ۋاقىتشا باسقارادى. زاڭ بويىنشا، 90 كۇننىڭ ىشىندە ەلدە كەزەكتەن تىس پرەزيدەنت سايلاۋى ۇيىمداستىرىلۋى ءتيىس.
بيىل اقپاندا 82 جاستاعى الجير پرەزيدەنتى ابدەلازيز بۋتەفليكا ساۋىردە وتەتىن سايلاۋعا قاتىساتىنىن جاريالاعان. وسىدان كەيىن ەلدە جاستار جاپپاي نارازىلىققا شىعىپ، بۋتەفليكانىڭ بيلىكتەن كەتۋىن تالاپ ەتىپ جاتىر. 2 - ناۋرىزدا مىڭداعان ادامنىڭ نارازىلىعىن پوليتسيا كۇشپەن باسۋعا تىرىسقان. پوليتسيامەن قاقتىعىستا 180-گە جۋىق ادام زارداپ شەككەن.
بۋتەفليكا ناۋرىز ايىندا پرەزيدەنت سايلاۋىنا بەسىنشى مارتە ءتۇسۋ جوسپارىنان اينىپ، سايلاۋدى ساۋىردەن جىل سوڭىنا اۋىستىرعان بولاتىن.
1991 -جىلى الجيردە يسلاميستىك توپتار مەن بيلىك اراسىندا ازاماتتىق سوعىس باستالدى. بۋتەفليكا بيلىككە ەلدەگى ازاماتتىق سوعىس كەزىندە، 1999 -جىلى، كەلدى. ول الجيردەگى ازاماتتىق سوعىستى توقتاتىپ، ەلدە بەيبىتشىلىك ورناتتى. قازىر نارازىلىققا شىققانداردىڭ اراسىندا «پرەزيدەنتكە قارسى ەمەسپىز، ول الجير ءۇشىن كوپ ءىس تىندىردى. ءبىراق قازىر پرەزيدەنت بولۋعا دەنساۋلىعى كەلمەيدى» دەيتىندەر دە بار.
www.azattyq.org
