قويانبايەۆ افريكادا قارۋلانعان ساربازدارمەن جۇرۋگە ءماجبۇر بولعانىن ايتتى

None
None
  استانا. قازاقپارات - نۇرلان قويانبايەۆ «بيزنەس پو- كازاحسكي» كارتيناسىنىڭ ءۇش بىردەي ءبولىمىن ءتۇسىرىپ، كينو نارىقتاعى تابىستى پروديۋسەردىڭ بىرىنە اينالدى.

 فيلمنىڭ سوڭعى ءبولىمىن افريكادا تۇسىرگەن ول سول جەردە كينو تۇسىرگەن العاشقى قازاق اتانىپ تا ۇلگەردى. الايدا مۇنداي اتاققا جەتۋ وڭاي سوقپاعان كورىنەدى.

«حابار» ارناسىنىڭ «قاراقاتپەن شاي» باعدارلاماسىندا قويانبايەۆ افريكادا كەزدەسكەن قيىنشىلىقتار جايلى باياندادى.

«كەنيا مەملەكەتىندەگى شاي پلانتاتسياسى وتە ادەمى ەكەن. ءبىراق شاي الىپ كەلگەن جوقپىز. كينو تۇسىرۋگە بارعاندىقتان، الىپ بارعان ۇجىمدى امان- ەسەن ەلگە الىپ كەلسەم ەكەن دەگەن وي بولدى.

كەنياعا ۇلكەن ۇجىممەن باردىق. بىزدە ەر بالالارمەن قاتار، قىزدار دا بار. سولار ءۇشىن ۋايىمدادىق. جولداستارىنا، وتباسىنا امان- ەسەن جەتكىزۋ دەگەن ماقسات بولدى»، - دەيدى قويانبايەۆ.

 نۇرلاننىڭ سوزىنە قاراعاندا، افريكا راسىمەن دە قورقىنىشتى ەل دەگەن اتقا لايىق. ايتكەنمەن، پروديۋسەر حالىقتىڭ قوناقجايلىعى تۋرالى دا ۇمىتپادى.

«كىشكەنتاي كەزىمىزدەن افريكا دەگەن جابايى، ول جەردەن قورقۋ كەرەك دەپ بىلەمىز. شىنىمەن قورقىنىشتى، مويىنداۋ كەرەك. ءبىراق وتە كەرەمەت، ادەمى جەر. حالقى دا وتە قوناقجاي. كاسىبي جاعىنان دا جاقسى قارسى الدى. كينو تۇسىرۋگە مۇمكىندىگىنشە جاعداي جاساپ بەردى.

 مەنتاليتەتىمىز ءارتۇرلى. باسقا ۇلت، باسقا قۇرلىقتىڭ ادامدارى. باسىندا ۇيرەنە المادىق، قورقىنىش بولدى»، - دەيدى نۇرلان.

 كينوپروديۋسەر رەتىندە نۇرلان ءبىرىنشى كەزەكتە قاراماعىنداعى اكتەرلەردىڭ قاۋىپسىزدىگىن ويلاعان. بۇعان دەيىن شەتەلگە شىققاندا بارىنشا بيۋدجەتتى ۇنەمدەۋگە تىرىسقان ول افريكاعا كەلگەندە اقشاسىن اياماعان كورىنەدى. سەبەبى:

 «مىندەتتى تۇردە قىمبات قوناق ءۇي الدىق. جالپى شەت ەلگە شىققان كەزدە ۇنەمدەۋگە تىرىسامىز. ءبىراق افريكادا قاۋىپسىزدىككە كوپ اقشا جۇمسادىق. ۇجىمدى قىمبات قوناق ۇيگە جاتقىزدىق. نايروبي قالاسىندا قاۋىپسىزدىك قىزمەتىنە جۇگىنىپ، ەكى قورعاۋشى الدىق. كالاشنيكوۆ اۆتوماتىمەن»، - دەيدى ول.

سوڭعى جاڭالىقتار