قاسىم- جومارت توقايەۆ: انالارىمىز قوعامنىڭ ۇيىتقىسى ەكەنىن ۇمىتپاۋىمىز كەرەك

«حالىقتىڭ الەۋمەتتىك جاعدايىن، تۇرمىس ساپاسىن جاقسارتۋ ەشقاشان كۇن تارتىبىنەن تۇسپەيدى. كوپ بالالى انالاردىڭ جاعدايى - الەۋمەتتىك سالانىڭ بارومەترى. دەنى ساۋ انادان دەنى ساۋ ۇرپاق تۋادى. ساپالى مەديتسينالىق كومەك، لايىقتى ءبىلىم العان بالادان وتانشىل، مىقتى ازامات شىعادى. ياعني، ادام كاپيتالىن دامىتۋ انالاردىڭ الەۋمەتتىك جاعدايىن جاقسارتۋمەن تىكەلەي بايلانىستى. انالارىمىز وتباسىنىڭ عانا ەمەس، قوعامنىڭ دا ۇيىتقىسى ەكەنىن ۇمىتپاۋىمىز كەرەك» دەدى پرەزيدەنت.

بۇدان كەيىن مەملەكەت باسشىسى الەۋمەتتىك سالانى جاقسارتۋ ءۇشىن اتقارىلىپ جاتقان جۇمىستارعا توقتالدى.

«الداعى ۋاقىتتا الەۋمەتتىك سالاعا 2 تريلليون تەڭگەدەن استام قارجى جۇمسالاتىنىن بىلەسىزدەر. از قامتىلعان كوپ بالالى وتباسىلاردى باسپانامەن قامتاماسىز ەتۋ ءۇشىن «نۇرلى جەر» باعدارلاماسى اياسىندا 40 مىڭنان استام جالدامالى پاتەر سالىنادى. وڭىرلەرگە جاساعان ساپارىمدا مەن وبلىستارداعى باسپانا قۇرىلىسىنىڭ جۇرگىزىلۋ بارىسىن ءجىتى قاداعالايتىن بولامىن. ەڭبەكاقىنى ءوسىرۋ، دەنساۋلىق ساقتاۋ سالاسىن ىلگەرىلەتۋ، دەموگرافيانى دامىتۋ، وڭىرلەردەگى ينفراقۇرىلىمداردى جاقسارتۋ سياقتى جۇمىستاردىڭ ءبارى جوسپارلى تۇردە ىسكە اسىرىلا بەرەدى. بۇل - بۇلجىمايتىن جوسپار»، دەدى ق. توقايەۆ.

ەستەرىڭىزگە سالا كەتەيىك، مەملەكەت باسشىسى قاسىم- جومارت توقايەۆ «Egemen Qazaqstan»  جانە «Aiqyn» گازەتتەرىنە سۇحبات بەردى.

«Egemen Qazaqstan» گازەتىنىڭ باسقارما ءتوراعاسى دارحان قىدىرالى مەن «Aiqyn»   گازەتىنىڭ باس رەداكتورى نۇرتورە جۇسىپكە بەرگەن سۇحباتىندا ق. توقايەۆ ءبىرقاتار ماڭىزدى ماسەلەگە توقتالدى.

ىشكى جانە سىرتقى ساياساتتى قامتىعان كەڭ كولەمدى سۇحباتتا قازاقستاننىڭ باسىم باعىتتارى، الەۋمەتتى تولعاندىرعان تاقىرىپتار ءسوز بولدى.