قىزىلوردادا جاس ونەرپازدار جىر كەشىن وتكىزدى

None
None
قىزىلوردا. قازاقپارات - قىزىلوردا قالاسىندا «جىرلاسا جاستار جىرلاسىن» اتاۋىمەن رەسپۋبليكالىق ءداستۇرلى ءان مەن جىر كەشى وتكىزىلدى، دەپ حابارلايدى قازاقپارات ءتىلشىسى.

اتالمىش شاراعا سىر ءوڭىرى ونەرپازدارىمەن بىرگە جەتىسۋ، قوستاناي، ورال، پاۆلودار ايماقتارىنان بەلگىلى انشىلەر قاتىستى. ولاردىڭ قاتارىندا ماقپال توقتاعانوۆا، الپىسبەك وڭايباي ۇلى، سالتانات قيزاتوۆا سىندى انشىلەر بار. ال كوپشىلىك الدىندا ءان مەن جىردان شاشۋ شاشقان جەرگىلىكتى ونەرپازدار كۇنسۇلۋ تۇرىكپەن، مارات سۇگىرباي، ەركەبۇلان شىڭجانوۆ، بەيسەمبەك تولەۋباي، ءادىلحان قۋاڭبايەۆ، نۇرتىلەك اقتايەۆ، مۇحامەدالي بەكپەيىسوۆ، قۋانىش العازيەۆ، جاراسحان تولەباي، زۋلفيا بايمىرزايەۆا جانە اماندىق جاپپاربەرديەۆ حالىق قوشەمەتىنە يە بولدى. سونداي-اق، جۇرتشىلىق الدىندا قازانعاپ اتىنداعى قىزىلوردا مۋزىكالىق كوللەجى مەن قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ ءداستۇرلى ءان-تەرمە بولىمىندە ءتالىم الىپ جۇرگەن دارىندى ورەندەر ونەر كورسەتتى.

ايتا كەتەرلىگى، اتالمىش ءىس-شارانى ۇيىمداستىرۋعا جاستاردىڭ ءوزى ۇيىتقى بولعان. يدەيا اۆتورلارى جانە ۇيىمداستىرۋشىلارى - بەلگىلى جاس جىراۋلار مارات سۇگىرباي مەن كۇنسۇلۋ تۇرىكپەن. ولاردىڭ ايتۋىنشا، ونەر دوداسى تۇڭعىش پرەزيدەنت - ەلباسىنىڭ «رۋحاني جاڭعىرۋ: بولاشاققا باعدار» جانە «ۇلى دالانىڭ جەتى قىرى» باعدارلامالىق ماقالالارى اياسىندا قولعا الىنىپ وتىر.

«سونداي-اق، اتالمىش شارا بيىلعى جاستار جىلىنا دا ارنالعان. ماقساتىمىز - ءداستۇرلى ءان، جىر، تەرمەنى تىڭدارمانعا جاڭا سيپاتتا ۇسىنۋ. وسىلايشا وسيەت پەن ونەگەگە تولى تەكتى ءسوزدىڭ تورەسى ۇلىقتاۋعا جول اشىلدى»، - دەدى ولار.

سوڭعى جاڭالىقتار