ابايدىڭ ءتىلىن نەگە الماي ءجۇرمىز؟

None
None
 نۇر-سۇلتان. قازاقپارات - ءبىز وسى ابايشا ءسۇيىپ، ابايشا نەگە كۇيمەيمىز؟

اباي اتاسىنان كەمەنگەر بوپ جاراتىلىپ، اناسىنان دانا، ەلىنە پانا، ءوز زامانىندا اسقاق ويلى عۇلاما، قازاق ءۇشىن دەرتتى بولعان، كەۋدەسى قايعى مەن قاسىرەتكە تولى قازاق تاريحىنداعى ەڭ ءىرى تراگەديالىق قايتالانباس تۇلعا.

قالىڭ ەلىم قازاعىم قايران جۇرتىم،

ۇستاراسىز اۋزىڭا ءتۇستى مۇرتىڭ،

جاقسى مەن جاماندى ايىرمادىڭ.

ءبىرى - ماي ءبىرى - قان بوپ ەكى ۇرتىڭ، - دەپ قاراڭعى قازاقتىڭ حال-احۋالىن وسىلايشا سۋرەتتەدى. ال بۇگىنگى XXI عاسىردا دا اباي كەشكەن ۋايىما سەيىلمەي تۇر. سەبەپ ءالى كۇنگە دەيىن جاقسى مەن جاماننىڭ ارا جىگىن اجىراتا الماي جۇرگەندىگىمىزدە. سانانى سان مىڭ سۇراق تورلايدى. قوعامداعى ەسەرسوقتاردىڭ ەسىرگەن ءىس-ارەكەتىن كورىپ قىنجىلامىز. ءبىر ءسات...

ءبىز وسى ابايشا ءسۇيىپ، ابايشا نەگە كۇيمەيمىز؟ ابايدىڭ ايتقان اقىلىن الىپ ءجۇرمىز بە؟ ۇمتىل دەگەن بيىگىنە ۇمتىلدىق پا؟ جاسا دەگەنىن جاساپ، ماڭىنا دا جۋىماۋعا ءتيىستىنى ساناعا قۇيدىق پا؟ الدە بالالىق پەن شالالىقتىڭ اسەرىنەن ءالى شىعا الماي ءجۇرمىز بە؟

بۇگىندە جاۋابى تابىلماعان سۇراق بەلگىلەر قازاق جاستارىن تۋرا جولدان اداستىرىپ، شىم-شىتىرىق الەمگە جەتەلەپ بارا جاتقان سەكىلدى.

كۇللى ادام بالاسىن قور قىلاتىن ءۇش نارسە بار. سودان قاشپاق كەرەك. اۋەلى - ناداندىق، ەكىنشىسى - ەرىنشەكتىك، ءۇشىنشى - زالىمدىق. 38-قارا سوزىندە كورسەتىلگەن باستى جاۋلارمەن قورعانباق بىلاي تۇرسىن، قالقانىمىزدى تەسىپ ءوتىپ بويىمىزعا ەنىپ بارادى. ماسەلەن ءۇش نارسەدەن قاشپاق تۇگىلى دوس بولىپ العاندىعىمىز الاڭداتادى.

اۋەلى - ناداندىق. ءبىزدىڭ قوعام سانالى جاستارمەن ەمەس، ساناسىز جاستارمەن قور بولۋدا. بىلمە بىلگەننەن ۇيرەنبەنىڭ كەبىن كەيىپ كەلەمىز. ناداندىقتان قۇتىلىپ، باسەكەگە قابىلەتتى جاستاردى تاربيەلەۋدە بار جاعداي جاسالعان. ءتىپتى «2019 -جىل جاستار جىلى» دەپ بەكىتىلدى. ءبىراق قازاق جاستارى ارزان كۇلكى مەن ارزان ومىرگە بەت بۇرىپ بارا جاتىر. وزگەگە ەلىكتەۋشىلىك باسىم بولىپ تۇر. ابايدىڭ ايتقانىنا قۇلاق اسپايتىنىمىز دا سوندىقتان بولار.

ەكىنشى - ەرىنشەكتىك. قاراپايىم ءومىردىڭ ءوزىن مىسال رەتىندە الساق بولادى. ويعا العان بۇگىنگى ءىسىمىزدى ەرتەڭگە ءتىپتى ارعى كۇنگە بەيمارال قالدىرا سالاتىندار جەتەرلىك. ەلدىڭ تاعدىرىنان بولەك ءوز ءومىرىنىڭ باعىتىن باعامداي الماي جۇرگەندەر كوپ. ابايدىڭ مال تاپ، ءبىلىم ال، ونەر ۇيرەن دەگەن اقىلىن الۋعا موينىمىز جار بەرمەي جۇرگەنى بەلگىلى.

ءۇشىنشى - زالىمدىق. قوعامدى ازعىنداتىپ، ۇرپاعىمىزدى ءتۇپ تامىرىمەن جويىپ جىبەرۋى مۇمكىن قاۋىپتى كۇشتىڭ ءبىرى. قازىرگى كەزەڭ زالىمدىقتى دا باستان وتكەرۋدە. ەر جىگىتتەرىمىز ەرگە ءتان مىنەزدەن اينىپ زالىمدىقتىڭ سان ءتۇرىن جاساۋدا. ورىمدەي جاس قىزدارىمىز باۋىر ەتى بالاسىن دالاعا تاستاپ جاتقاندا كەلەشەككە ەش الاڭسىز قول سوزۋ مۇمكىن ەمەستىگى ايدان انىق. زالىمدىقتىڭ كوبەيۋىنىڭ ءبىر قىرى جاستاردىڭ كىتاپتىڭ پاراقتارىن اقتارۋدىڭ ورنىنا، الەۋمەتتى جەلىگە تەلمىرۋىنەن دەپ توپشىلاۋعا بولادى. سانا ۋلانسا زالىمدىق تا ورشەيتىنى ءسوزسىز.

تونگەن قاۋىپتەردەن قۇتىلۋ جولى - دانالار سالعان دارا جولمەن ءجۇرۋ كەرەكتىگىن ۇعىنۋمىز كەرەك. «ءولدى دەۋگە بولا ما ايتىڭدارشى، ولمەي تۇعىن ارتىنان ءسوز قالدىرعان» دەمەكشى ابايدىڭ ءتىلىن الار بولساق ەلىمىزدىڭ گۇلدەنۋىنە قازاق جاستارى ءبىر كىسىدەي ات سالىسار ەدى. وتكەنىمىزدى ۇعىنباي، بۇگىنىمىزگە سەنىممەن قاراۋ مۇمكىن ەمەس. اباي سەنگەن بۇگىنگى جاستار سەنىمدى اقتاسا نۇر ۇستىنە، نۇر بولارى اقيقات.

 

politic.bugin.kz

سوڭعى جاڭالىقتار