مينيسترلىك مەكتەپ مۇعالىمدەرىن دايارلاۋ ماسەلەسىن ءتۇسىندىردى

None
None
نۇر-سۇلتان. قازاقپارات - ق ر ءبىلىم جانە عىلىم ۆيتسە-ءمينيسترى بيبىگۇل اسىلوۆا اعىلشىن تىلىندە ساباق بەرەتىن مۇعالىمدەردى دايارلاۋ شارالارى تۋرالى ايتىپ بەردى، دەپ حابارلايدى قازاقپارات ءتىلشىسى.

«نەگىزى، 2016 -جىلى جاڭارتىلعان ءبىلىم باعدارلاماسى قولعا الىنعاندا ءبىز بىردەن باكالاۆر مەن ماگيستراتۋرا بويىنشا مامان دايارلاۋعا كىرىستىك. ءدال وسى ماماندار حيميا، بيولوگيا، فيزيكا سياقتى جاراتىلىستانۋ- ماتەماتيكا پاندەرىن اعىلشىن تىلىندە وقىتادى. 2020-2021 -جىلدارى باكالاۆر مەن ماگيسترانتتار وقۋدى اياقتاپ، مەكتەپتەرگە كەلە باستايدى. ولاردىڭ بارلىعى - جاڭادان كەلەتىن مۇعالىمدەر. ءبىز ولاردى مەملەكەتتىك تاپسىرىسپەن ارنايى وقىتىپ جاتىرمىز»، - دەدى ب. اسىلوۆا قازاقپارات تىلشىسىنە بەرگەن سۇحباتىندا.

ۆيتسە-ءمينيستردىڭ ايتۋىنشا، جاس مامانداردىڭ ءبارى وتاندىق جوعارى وقۋ ورىندارىندا ءبىلىم الىپ ءجۇر. ولار ءبىرىنشى كۋرستان باستاپ تەك اعىلشىن تىلىندە عانا وقىتادى. باكالاۆر دا، ماگيستراتۋرا دا سولاي.

«ماگيسترانتتار وقۋدى اياقتاۋعا جاقىن. ال باكالاۆر 2020-2021 -جىلدارى وقۋدى اياقتايدى. ولاردىڭ بارلىعى مەكتەپكە بارىپ، ءۇش جىلداي جۇمىس ىستەۋگە مىندەتتى. مەملەكەتتىك تاپسىرىستىڭ شارتى سولاي»، - دەپ اتاپ كورسەتتى ب. اسىلوۆا.

ايتا كەتەيىك، بۇعان دەيىن ق ر ءبىلىم جانە عىلىم ءمينيسترى كۇلاش ءشامشيدينوۆا دا اعىلشىن تىلىندە ساباق وقىتۋعا قاتىستى پىكىر بىلدىرگەن بولاتىن.

«بۇگىندە بارلىق ادامداردى ويلاندىرىپ جۇرگەن ماڭىزدى ءبىر ماسەلە ول - حيميا، فيزيكا، ينفورماتيكا مەن بيولوگيا پاندەرىن جوعارى كلاستا اعىلشىن تىلىندە وقىتۋ. وسىعان بايلانىستى قازىر اعىلشىنشا ساباق بەرۋگە اسىقپاي كوشۋ تۋرالى شەشىم قابىلدانىپ وتىر. رەسپۋبليكا بويىنشا 150 دەن ارتىق مەكتەپ ول باعدارلاماعا كوشكەن. ءبىز قازىر بۇلاردى زەردەلەپ، قاراپ وتىرمىز. وقۋشىلار نەدەن قينالىپ وتىر؟ ۇستازدار قانداي قيىندىق كورىپ جاتىر؟ ءبىز ولارعا قالاي كومەكتەسەمىز؟ سونى جان-جاقتى زەردەلەپ جاتىرمىز. سوندىقتان ۇستاز بەن مەكتەپ دايىن بولعان كەزدە، وزدەرىڭىزبەن كەلىسە وتىرىپ، بىرتىندەپ اعىلشىن تىلىندە وقىتۋدى ەنگىزە باستايمىز. اسىقپايمىز، ەشكىم قۋىپ كەلە جاتقان جوق»، - دەدى ك. ءشامشيدينوۆا استاناداعى كوپبالالى انالارمەن بولعان كەزدەسۋدە.

سوڭعى جاڭالىقتار