قازاقستاندىقتار شەتەلدىك دەمالىسقا قانشا قاراجات جۇمسايدى

نۇر-سۇلتان. قازاقپارات - ەسەپ كوميتەتىنىڭ كەزەكتى وتىرىسىندا تۋريستىك قىزمەتتى دامىتۋعا باعىتتالعان مەملەكەتتىك قاراجاتتىڭ ءتيىمدى قولدانىلۋى تۋرالى مەملەكەتتىك اۋديت قورىتىندىسى شىعارىلدى، دەپ حابارلايدى قازاقپارات ءتىلشىسى.

اۋديت ق ر مادەنيەت جانە سپورت مينيسترلىگىنىڭ تۋريزم يندۋسترياسى كوميتەتى مەن «Kazakh Tourism»  ا ق قامتىعان.

«وتاندىق تۋريستىك سالا باياعىدان سەرۆيستىك ينفراقۇرىلىمى دامىعان تانىمال شەتەلدىك تۋريستىك ورتالىقتارمەن باسەكەلەستىكتە كەلە جاتىر جانە ءقازىر بۇل سالادا جۇمىستى جاقسارتىپ قانا قويماي، ۇيىمداستىرۋ قۇرىلىمىن وزگەرتۋ كەرەك. ءيا، بۇل قيىن جۇمىس، ءبىراق تۋريزم بەرەكەلى اقشانى تەز تاباتىن سالا»، - دەدى ەسەپ كوميتەتىنىڭ مۇشەسى تالعات جاقان.

ق ر ۇلتتىق ەكونوميكا مينيسترلىگىنىڭ ستاتيستيكا كوميتەتى كەلتىرگەن دەرەكتەرگە سايكەس، جىل سايىن قازاقستاندا شەتەلدەرگە شىعۋ تۋريزمىنىڭ ۇلەسى ەلدەگى تۋريزم ۇلەسىنەن ءبىر جارىم ەسەگە ارتىپ كەلەدى.

ونىڭ ايتۋىنشا، كوپتەگەن ساۋالنامالار بويىنشا، قازاقستاندىقتار قولايلى باعا ساياساتى، كولىكتىك جانە لوگيستيكالىق قولجەتىمدىلىك پەن كورسەتىلەتىن قىزمەت ساپاسى بولعاندا، دەمالىستى قازاقستاندا وتكىزگىسى كەلەدى.

«ساپاسىز ينفراقۇرىلىمعا، قىمبات باعا جانە ىڭعايلى قوناقۇيلەردىڭ جەتىسپەۋىنە بايلانىستى قازاقستان ازاماتتارى شەتەلدىك تۋريستىك ونىمدەردى ارتىق كورەدى، جىل سايىن ورتا ەسەپپەن 2,7 ميلليارد ا ق ش دوللارى بولاتىن ۇلتتىق ۆاليۋتامىز كەتەدى. مۇندا شەتەلدە لايىقتى دەمالىسقا بارا الاتىن وتانداستارىمىز ءۇشىن عانا قۋانۋعا بولادى، ال شەتەلگە كەتەتىن اقشا قازاقستان ەكونوميكاسىنا قايتىپ ورالمايدى»، - دەدى ول.