مينيستر ساپاربايەۆ اتاۋلى الەۋمەتتىك كومەكتى الۋ ءتارتىبىن ءتۇسىندىردى

وڭىردەگى اۋىل جانە اۋدان اكىمدەرىمەن كەزدەسكەن توپ مۇشەسى، ق ر ەڭبەك جانە الەۋمەتتىك قورعاۋ ءمينيسترى بەردىبەك ساپاربايەۆ بيىلعى جىلدىڭ 1 -ساۋىرىنەن باستاپ بەرىلەتىن اتاۋلى كومەكتى الۋ ءتارتىبى تۋرالى ايتىپ بەردى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، كوپ بالالى وتباسىلارى مەن مۇگەدەكتەرگە بيىلعى جىلدىڭ 1 -شىلدەسىنەن باستاپ بەرىلەدى دەپ جوسپارلانعان اتاۋلى الەۋمەتتىك كومەكتى بەرۋ ءتارتىبى ءبىرشاما وزگەردى. مەملەكەت باسشىسىنىڭ باستاماسىمەن اتاۋلى كومەك 1 -ساۋىردەن باستاپ بەرىلەدى.

«2018 -جىلى اتاۋلى كومەك كولەمى 40-50 پايىزعا وسسە، بيىلعى جىلى 70 پايىزعا كوتەرىلەدى. ءسويتىپ، ەندىگى ارادا كوپبالالى وتباسىلارعا بەرىلەتىن جاردەماقى 14849 تەڭگەدەن 20789 تەڭگەگە جەتىپ وتىر»، دەدى بەردىبەك ساپاربايەۆ.

ءمينيستردىڭ ايتۋىنشا، وسىنداي كوبەيتىلگەن اتاۋلى كومەكتى رەسپۋبليكا بويىنشا 830 مىڭ ادام، ال اقمولا وبلىسىندا 18651 ادام الۋعا ءتيىس.

«اتاۋلى كومەك الۋعا قاتىستى جۇرتشىلىقتى تولعاندىراتىن جانە ورىندى رەنىشىن تۋعىزاتىن جاي- قۇزىرلى ورگانداردىڭ قاجەتسىز قۇجاتتاردى تالاپ ەتىپ، ادامداردى اۋرە-سارساڭعا سالاتىنى بەلگىلى. سول سەبەپتى، ەندىگى ارادا جاردەماقى الۋ ءۇشىن جالعىز عانا قۇجات - جەكە باسى كۋالىگى عانا تالاپ ەتىلەدى. اتاۋلى الەۋمەتتىك كومەك الۋعا قاجەتتى باسقا بارلىق قۇجاتتار ەلەكتروندىق نۇسقادا حالىققا قىزمەت كورسەتۋ ورتالىقتارى ارقىلى قابىلدادى»، - دەدى بەردىبەك ساپاربايەۆ.