تۇركيانىڭ ەكس- پرەزيدەنتى ابدۋللاح گۇل: نۇرسۇلتان نازاربايەۆ - تۇتاس تۇركى الەمىنىڭ اقساقالى

نۇر- سۇلتان. قازاقپارات - نۇرسۇلتان نازاربايەۆ - تۇتاس تۇركى الەمىنىڭ اقساقالى. ول وتە قيىن ءارى ماڭىزدى شەشىم قابىلدادى. تۇركيا رەسپۋبليكاسىنىڭ بۇرىنعى پرەزيدەنتى ابدۋللاح گۇل ارنايى سۇحباتى بارىسىندا وسىلاي ءمالىم ەتتى،

 دەپ حابارلايدى قازاقپارات «حابار 24» تەلەارناسىنا سىلتەمە جاساپ.

2007-2014 -جىلدار ارالىعىندا تۇركيا پرەزيدەنتى بولعان ابدۋللاح گۇل مەن ەلباسى نۇرسۇلتان نازاربايەۆ اراسىنداعى جىلى قارىم- قاتىناس بارشامىزعا ءمالىم. وسى كەزەڭدە باۋىرلاس ەكى ەلدىڭ بايلانىسى تەرەڭدەي ءتۇسىپ، قوس باسشىنىڭ رەسمي ساپارلارى ءجيى بولۋىمەن ەرەكشەلەندى. ولاردىڭ اراسىنداعى دوستىق ابدۋللاح گۇلدىڭ پرەزيدەنتتىك قىزمەتىنەن كەتكەننەن كەيىن دە جالعاسىن تاپتى.

گۇل مىرزا قازاق ەلىندە ۇيىمداستىرىلعان حالىقارالىق جيىندارعا قاتىسىپ وتىرعان. نۇرسۇلتان ءابىش ۇلىنىڭ تاريحي شەشىمى قازاق ەلىن عانا ەمەس، تۇركى الەمىن دە تولعاندىردى. تۇركيانىڭ بەلدى ساياساتكەرلەرىنىڭ قاتارىندا ابدۋللاح گۇل مىرزا دا ەلىمىزدەگى وزگەرىستەرگە وراي ءوز پىكىرىن ءبىلدىردى.

«نۇرسۇلتان نازاربايەۆتىڭ كوكەيىندەگى قازاقستان تەك ماتەريالدىق تۇرعىدان باي ادەمى قالالارى، ادەمى جولدارى بار ەل ەمەس، دەموكراتيالىق- قۇقىقتىق، زاڭدارى ۇستەم، ەركىن نارىق ەرەجەسىمەن جۇرەتىن جەتىستىگى تولاسسىز جاڭا بەلەستەرگە جەتەلەيتىن مەملەكەت ەدى. وسى ماقساتقا جەتۋ ءۇشىن تۇڭعىش پرەزيدەنت رەتىندە 30 جىل تىنباي ەڭبەك ەتتى. 10 مىڭداعان قازاق جاسىنىڭ شىعىس پەن باتىستىڭ الدىڭعى قاتارلى وقۋ ورىندارىندا ءبىلىم الۋىنا مۇمكىندىك بەردى. قازاقستاننىڭ دۇرىس باعىتتا دامۋىن جالعاستىرا بەرۋ ءۇشىن جاڭا بۋىنعا، ءىزباسارلارىنا بيلىكتى بەردى»، - تۇركيا رەسپۋبليكاسىنىڭ 11-پرەزيدەنتى ابدۋللاح گۇل.

ابدۋللاح گۇلدىڭ ايتۋىنشا، جاڭا باسشى رەتىندە تاعايىندالعان قاسىم- جومارت توقايەۆ وسى سەنىمگە لايىقتى.

«كەيبىر كوشباسشىلار ءوز باقىلاۋىندا ۇستاپ وتىراتىن ادامداردى ءىزباسار رەتىندە تاعايىندايدى. بۇل جاعدايدا بيلىكتىڭ الماسۋى ءىس جۇزىندە جۇزەگە اسپاعان بولادى. ال قازاقستان جاعدايىندا بيلىكتىڭ ءىس جۇزىندە اسقاندىعى كورىنىپ تۇر. مەن دە ءوز باسىم قاسىم- جومارت توقايەۆتى جاقسى تانيمىن ءارى قۇرمەتتەيمىن. قازاقستان نۇرسۇلتان نازاربايەۆ مۇرات ەتكەن ەلگە اينالادى دەگەن سەنىمدەمىن. قازىر دە الەمدە دامىعان 50 ەلدىڭ قاتارىندا. مۇنىمەن ۇزدىك وتىزدىقتىڭ قاتارىندا ەنۋى دە الىس ەمەس»، - دەدى ابدۋللاح گۇل.

تۇركى الەمىندەگى ىنتىماقتاسۋ ۇردىسىندە نۇرسۇلتان نازاربايەۆتىڭ ماڭىزى زور. ابدۋللاح گۇلدىڭ بايانداۋىنشا، ەلباسى ءتۇبى ءبىر تۇركى جۇرتىنىڭ ەرتەڭىن باياندى ەتۋگە باعىتتالعان ءبىرقاتار جۇمىستى جۇزەگە اسىردى.

«ن. نازاربايەۆ قازاق جاستارىندا تۇركى الەمى ساناسىن قالىپتاستىردى. سونداي- اق ەلباسى ەكەۋمىزدىڭ باستامامىزبەن تۇركى كەڭەسى قۇرىلدى. تۋىس حالىقتاردىڭ عىلىمي قاۋىمداستىعىنىڭ عىلىم مەن ءبىلىمىنىڭ دامۋىنا جاعداي جاساۋ ءۇشىن تۇركى اكادەمياسىنىڭ نەگىزى قالاندى. ءتۇبى ءبىر تۇركى جۇرتىنا ەلەۋلى ۇلەسى ءۇشىن ەلباسىنى تۇركى الەمىنىڭ دانا اقساقالى دەپ اتادىق»، - ابدۋللاح گۇل.

ايتا كەتكەن ءجون، تۇرىك ەلىنىڭ 11-پرەزيدەنتى بىرنەشە جىلدان بەرى تەلەارنالارعا ارنايى سۇحبات بەرۋدەن باس تارتقان بولاتىن.

 «الايدا گۇل مىرزا ءبىزدىڭ ءوتىنىشىمىزدى جەرگە تاستامادى. بۇل دا - ءبىر قازاقستانعا دەگەن قۇرمەتتىڭ بەلگىسى»، - دەپ جازادى تەلەارنا ءتىلشىسى مەرۋەرت قاناعات.