قازاق ەپوسىنىڭ باتىرلارى الماتى كوشەلەرىمەن ءجۇرىپ ءوتتى
ۇلتتىق كوستيۋم كيگەن 2 مىڭعا جۋىق ادام، بۇركىتشى، قۇسبەگىلەر، تازى باپتاعان اڭشىلار الماتى كوشەلەرىنىڭ ءسان سالتاناتىن كەلتىردى. «ناۋرىز شەرۋى» اباي كوشەسىمەن قازاق مەملەكەتتىك سيركى جانىنان ساپ تۇزەپ، ابىلاي حان كوشەسىمەن قابانباي باتىر كوشەسىنە دەيىن ءجۇرىپ بارىپ، اباي اتىنداعى مەملەكەتتىك وپەرا جانە بالەت تەاترى ماڭايىندا توقتادى.
سامارقاننىڭ كوك تاسىن ەرىتكەن ناۋرىز مەيرامىن، كوكتەمنىڭ جىلى لەبىن جەتكىزۋگە، ۇلتتىق نىشاندى كورسەتۋگە مادەنيەت سالاسىنىڭ، ەتنوستىق بىرلەستىكتەر، جوو ستۋدەنتتەرى مەن مۇعالىمدەرى، بۇركىتشىلەر مەن كاسىبي اڭشىلار قاتىستى.
«بيىل ءبىرىنشى رەت قازاقتىڭ ءتول تاريحىنىڭ كەيىپكەرلەرى، قازاق ەپوسىنىڭ كەيىپكەرلەرى مەن باتىرلارى، التىن ادام، حان- سۇلتاندار شەپ قۇرادى. بۇل كوكتەم مەرەكەسى، بىرلىك پەن تاتۋلىقتىڭ بەلگىسى. قازاقستاندىقتاردى وسى مەرەكەمەن قۇتتىقتايمىن»، - دەدى قازاق مەملەكەتتىك سيركىنىڭ ديرەكتورى باقىت بوكەبايەۆ.
