قىرعىزستان مەن تاجىكستان شەكاراسىندا قاقتىعىس بولدى

وقيعا كوجوگاردا بولعان. قاقتىعىسقا باتكەن اۋدانى اقساي اۋىلىنىڭ جانە مەحناتاباد اۋىلىنىڭ تۇرعىندارى قاتىسقان. بۇعان اق-ساي - تامدىق اينالما جولىنىڭ سالىنۋى سەبەپ بولعان.

اقپارات بويىنشا، قاقتىعىسقا تاجىكستاننىڭ 70 ازاماتى جانە قىزعىزستاندىق 50 ازامات قاتىسقان. ولار ءبىر-ءبىرىن تاسپەن اتقان كورىنەدى.

وقيعا ورنىنا ەكى ەلدىڭ شەكاراشىلارى كەلىپ، اسكەريلەردىڭ كومەگىمەن جانجال باسىلعان.

دەگەنمەن قىرعىزستاندىق تاراپ اق-ساي جولىن جاۋىپ تاستاپتى، ال تاجىكستاندىقتار ءوز كەزەگىندە ءتورت-كوچو جولىن جاپتى.

قازىرگى تاڭدا جاعداي باقىلاۋعا الىنعان. ماماندار تۇرعىندار اراسىندا ءتۇسىندىرۋ جۇمىستارىن جۇرگىزىپ جاتىر.

اتالمىش جايتقا بايلانىستى قىرعىزستان جانە تاجىكستاننىڭ شەكارا وكىلدەرىنىڭ كەزدەسۋى وتكىزىلدى. تاراپتار تاجىك-قىرعىز شەكاراسىنداعى احۋالدى تۇراقتاندىرۋ جونىدەگى كەلىسىمگە كەلدى.

باتكەندىك شەكارا جاساعىنىڭ جەكە قۇرامى كۇشەيتىلگەن كۇزەت تۇرىنە اۋىسقانى حابارلاندى.

قاقتىعىس كەزىندە قىرعىزستان تاراپىنان ءبىر ادام جاراقاتپەن ساماركاندەك اۋرۋحاناسىنا جەتكىزىلگەن.

Sputnik تاجىكستاننىڭ مالىمەتىنشە، ەكى ەل شەكاراشىلارى ادامداردى باسۋ ءۇشىن ەسكەرتپە وق اتقان.