اۋىر اتلەتيكادان الەم چەمپيوناتى: قازاقستان قورجىنىنا ءۇشىنشى «التىن» ءتۇستى

«بۇگىن قازاقستان قۇراماسىنىڭ قورجىنىنا تاعى ءبىر التىن ءتۇستى. 81 كەلىگە دەيىنگى سالماقتا پوموستقا شىققان ساپي ەسەنگەلدى قوسسايىس بويىنشا 309 كەلى (جۇلقا كوتەرۋدە 134 كەلى، سەرپە كوتەرۋدە 175 كەلى) سالماقتى باعىندىرىپ، التىن مەدالعا يە بولدى. ساپي ءۇشىن بۇل ءبىرىنشى حالىقارالىق سايىس»، - دەپ حابارلادى قازاقستان اۋىر اتلەتيكا فەدەراتسياسىنىڭ باسپا ءسوز قىزمەتىنەن.

ەسكە سالا كەتسەك، قازىرگى ۋاقىتتا لاس-ۆەگاستا اۋىر اتلەتيكادان جاس وسپىرىمدەر اراسىنداعى الەم چەمپيوناتى ءوتىپ جاتىر. دودادا ەل نامىسىن بەس سپورتشى قورعاۋدا.

چەمپيوناتتاعى العاشقى مەدالدى قازاقستان قۇراماسىنىڭ قورجىنىنا 16 جاستاعى سپورتشى سايرامكەز اقمولدا سالعان ەدى. الماتى وبلىسىنىڭ تۋماسى 61 كەلىگە دەيىنگى سالماق ساناتىندا التىن جۇلدە جەڭىپ الدى.

ال كەشە قازاقستان اۋىر اتلەتيكا فەدەراتسياسى سايىستىڭ ەكىنشى كۇنى 67 كەلىگە دەيىنگى سايحان تايسۋيەۆ قوسسايىستا 288 كەلى كوتەرگەنىن (127 كەلى جۇلقا كوتەرۋدە جانە 161 كەلى سەرپە كوتەرۋدە) حابارلادى.

«سونىمەن بىرگە سايحان جۇلقا جانە سەرپە كوتەرۋ جاتتىعۋىندا كىشى التىن مەدالدى يەلەندى. بۇدان بولەك، سايحان جۇلقا كوتەرۋدە ءوزىنىڭ جاس ساناتىندا جاڭا الەمدىك رەكورد ورناتتى»، - دەپ حابارلانعان بولاتىن فەدەراتسيانىڭ حابارلاماسىندا.