فرانسيا سىرتقى ىستەر مينيسترلىگى ماڭىزدى قىزمەتتە ايەل از بولعانى ءۇشىن ايىپپۇل تولەيدى

بۇل تۋرالى Le Monde حابارلادى. باسىلىمنىڭ جازۋىنشا، ايىپپۇل 2017 -جىلى ەلشى قىزمەتىنە ۇمىتكەرلەردىڭ كوبى ەر ادامدار بولعاندىقتان سالىنعان.

فرانسيا زاڭى بويىنشا، ەلشى قىزمەتىنە ۇمىتكەر ديپلوماتتاردىڭ كەمىندە 40 پايىزى ايەل بولۋى شارتى. ءبىراق 2017 -جىلى ولاردىڭ سانى 29 پايىزدان اسپاعان، ياعني تالاپقا ساي بولۋعا بەس ايەل جەتپەي قالعان. ەندى مينيسترلىك سولاردىڭ ءاربىرى ءۇشىن 90 مىڭ ەۋرودان ايىپپۇل تولەيدى.

اتى- ءجونىن اتاماعان فرانسۋز شەنەۋنىگىنىڭ ايتۋىنشا، 2018 -جىلى فرانسيا سىرتقى ىستەر مينيسترلىگىندەگى ماڭىزدى قىزمەتكە ۇمىتكەر سانى زاڭ تالابىنا ساي بولعان. ءبىراق قازىر ەلشى قىزمەتىندەگى ايەل سانى ءالى دە از: بار بولعانى 26 پايىز عانا دەپ جازادى باسىلىم.

دۇنيەجۇزىلىك بانك دەرەگىنشە، فرانسيا الەم بويىنشا گەندەرلىك تەڭدىكتى ساقتاپ وتىرعان التى مەملەكەتتىڭ ءبىرى. ساراپشىلار ولاردىڭ اراسىندا فرانسيامەن بىرگە دانيا، لاتۆيا، بەلگيا، شۆەتسيا جانە ليۋكسەمبۋرگتى اتايدى. دۇنيەجۇزىلىك بانك زەرتتەۋىندە بۇل سالادا سوڭعى ون جىلدا فرانسيانىڭ العا شىققانى ايتىلعان.

www.azattyq.org