تاتارستاندا «التىن ادامنىڭ» زەرگەرلىك بۇيىمدارى كورمەگە قويىلادى
شارا حالىقارالىق «التىن ادامنىڭ الەم مۋزەيلەرىنە شەرۋى» جوباسى اياسىندا 2019 -جىلعى 15 - ناۋرىز-15 - ءساۋىر ارالىعىندا وتەدى.
كورمەنىڭ ماقساتى - قازاقستاننىڭ تاريحي- مادەني باي مۇراسىمەن شەتەلدىك كورەرمەندى تانىستىرۋ. كورمەگە قازاقستان رەسپۋبليكاسىنىڭ سيمۆولى سانالاتىن «التىن ادام» قويىلادى.
1960-جىلداردىڭ سوڭى مەن 1970-جىلداردىڭ باسىندا الماتىنىڭ ماڭايىندا تانىمال ارحەولوگ كەمال اقىشيەۆ زەرتتەپ جۇرگەن ەسىك قورعانىنان قازاقستاننىڭ سيمۆولىنا اينالعان ساق پاتشاسى - «التىن ادامنىڭ» سۇيەگى تابىلعان ارحەولوگيالىق سەنساتسيا ورىن الدى. باعا جەرپەس ولجاعا «قازاق تۋتانحامونى» دەگەن ات بەرىلىپ، عاسىر جاڭالىعى دەپ تانىلدى. ەجەلگى دالا بيلەۋشىسىنىڭ تاجىسىندەگى قاناتتى التىن پىراق اشەكەيلەرى قازاقستان رەسپۋبليكاسى ەلتاڭباسىنىڭ بولشەگىنە اينالدى، ال التىن ادامنىڭ ءمۇسىنى الماتىداعى تاۋەلسىزدىك الاڭىنا ورناتىلدى.
جارتى عاسىرعا جۋىق ۋاقىت وتكەننەن كەيىن قازاقستان رەسپۋبليكاسى ۇلتتىق مۋزەيى حالىقارالىق «التىن ادامنىڭ الەم مۋزەيلەرىنە شەرۋى» ساياحاتىن جاريالادى. اۋقىمدى جوبا شەڭبەرىندە بەلورۋس، رەسەي، ازەربايجان، قىتاي، پولشا جانە وڭتۇستىك كورەيا مۋزەيلەرىندە كورمەلەر ۇلكەن جەتىستىكپەن ءوتتى. كورمە 2019 -جىلدىڭ سوڭىنا دەيىن جەر شارىنىڭ التى ەلىنە باراتىن بولادى.
مەملەكەتتىك «قازان كرەملى» قورىق- مۋزەيىندەگى كورمەدەن كيىمى التىن جاپسىرمالى جانە جەبە، قار بارىسى، ارقار، جىلقى جانە قۇس تۇرىندەگى التىن تىلىمشەلەر اشەكەيلەپ تۇرعان كونۋس ءپىشىندى ەرەكشە باس كيىمدى التىن ادامنىڭ رەكونسترۋكتسياسىن جانە وسى جاس اق سۇيەك ساق جاۋىنگەرىمەن (ارحەولوگتاردىڭ پىكىرلەرى بويىنشا 17-18 جاستار شاماسىندا) بىرگە جەرلەنگەن ەرتە تەمىر عاسىرىنىڭ (ب. د. د V- IV ع ع. ) ارحەولوگيالىق ولجالارىنىڭ كوللەكسياسىن تاماشالاۋعا بولادى.
كورمەگە قازاقستان رەسپۋبليكاسى ۇلتتىق مۋزەيىنىڭ قورلارىنان بارلىعى 127 زات ۇسىنىلادى. كورمەگە ۇسىنىلاتىن قازاقستاننىڭ ەجەلگى جانە ورتاعاسىرلىق ونەرىنىڭ جاۋھارلارى - بۇل ەۋرازيا دالا مادەنيەتى مۇراسىنىڭ وزىندىك ەرەكشەلىگىن كورسەتەتىن بۇرىنعىنىڭ اتاۋسىز شەبەرلەرى تۋىندىلارىنىڭ از عانا بولىگى.