سولتۇستىك كورەيا ەكىنشى يادرولىق سامميتتىڭ ەش كەلىسىمسىز اياقتالعانىن ايتتى

The New York Times باسىلىمىنىڭ جازۋىنشا، سولتۇستىك كورەيا كيم چەن ىن مەن دونالد ترامپتىڭ كەزدەسۋى ەش كەلىسىمسىز اياقتالعانىن جانە سولتۇستىك بۇعان ا ق ش- تى كىنالايتىنىن ايتتى.

«وسى كۇنگە دەيىن سولتۇستىك كورەيانىڭ بۇقارالىق اقپارات قۇرالدارى 27-28- اقپاندا ۆەتنامدا وتكەن كيم چەن ىن مەن دونالد ترامپتىڭ كەزدەسۋىنىڭ ءساتسىز اياقتالعانى تۋرالى ەشتەڭە جازباعان ەدى. سامميتتىڭ ساتسىزدىگى كيم ءۇشىن ۇلكەن جەڭىلىس، ال ول ترامپتان سولتۇستىك كورەيانى ب ۇ ۇ سانكسيالارىنان بوساتۋدى تالاپ ەتكەن ەدى»، دەپ جازادى باسىلىم.

«سولتۇستىك كورەيا حالقى كيم چەن ىن مەن دونالد ترامپتىڭ ەكىنشى كەزدەسۋى جوعارى دەڭگەيدە ءوتىپ، جاقسى ناتيجە بەرەدى دەپ ۇمىتتەنگەن ەدى. دەگەنمەن، كەزدەسۋ ەش كەلىسىمسىز اياقتالعان سوڭ، حالىقتىڭ ەڭسەسى ءتۇسىپ كەتتى. كوپشىلىگى بۇل امەريكا قۇراما شتاتتارىنىڭ جاۋاپكەرشىلىگىندە ەكەنىن ايتۋدا»، دەپ جازىپ جاتىر سولتۇستىك كورەيا باسىلىمدارى.

ايتا كەتۋ كەرەك، ب ۇ ۇ سانكسيالارى سولتۇستىك كورەيانىڭ ەكونوميكاسىنا اۋىر سوققى بولدى. ال ەكىنشى يادرولىق سامميتتە سولتۇستىك كورەيا يادرولىق قارۋدى دەمونتاجداۋ باعدارلاماسىن جۇزەگە اسىرۋ ءۇشىن نەگىزگى سانكسيالاردى الىپ تاستاۋدى سۇراعان ەدى. سامميت ءساتسىز اياقتالسا دا، سولتۇستىك كورەيا باسىلىمدارى كيمنىڭ الەمدىك ارەناداعى سوزدەرىن جارىسا جازىپ، ساتسىزدىك تۋرالى جاق اشپاعان بولاتىن.

ساراپشىلار ءبىر اپتادان سوڭ وسىنداي ماتەريالداردىڭ پايدا بولا باستاعانىنىڭ ارتىندا نە تۇرعانىن ويلاپ الاڭداۋشىلىق ءبىلدىرىپ وتىر.