ۋنيۆەرسيادا: قازاقستان حوككەيشىلەرى توپتىق كەزەڭدە ءبىرىنشى ورىن الدى

ەكى قۇراما بۇعان دەيىن ءتورت ويىندا دا جەڭىسكە جەتكەن ەدى. قازاقستاندىق حوككەيشىلەر الدىمەن الدىمەن لاتۆيانى 10:1 ەسەبىمەن جەڭسە، ودان كەيىن شۆەتسيادان 5:1,  ۇلى بريتانيادان 17:1، شۆەيتساريادان 7:0 ەسەبىمەن باسىم ءتۇستى. ال كانادا قۇراماسى  ۇلىبريتانيانى 12:0، لاتۆيانى 6:1، شۆەيتساريانى 6:2، شۆەتسيانى 11:1 ەسەبىمەن جەڭدى. ءتورت تۋردان كەيىن قازاقستان مەن كانادا 12 ۇپاي جيناعان ەدى. سوندىقتان توپتىڭ جەڭىمپازى بۇگىنگى كەزدەسۋدە انىقتالاتىن.

بۇگىنگى جەكپە-جەكتە ءبىزدىڭ حوككەيشىلەر 1-مينۋتتا انتون نەكرياچ ەسەپ اشتى. ودان كەيىن دە قازاقستاندىق جاستار ەكى شايبا سوعىپ كەتتى. اۋەلى ەگور شالاپوۆ 9-مينۋتتا ەسەپتى ۇلعايتسا، ەكىنشى كەزەڭنىڭ 23-مينۋتىندا ەميل نۇرعاليەۆ قانجىعاسىن مايلادى. ەكىنشى كەزەڭدە كانادالىق حوككەيشىلەر ەكى شايبامەن جاۋاپ قايتاردى. اتاپ ايتقاندا، داۆيد تومپسون 32، دانيەل دەل پاگيو 37-مينۋتتا مەرگەندىك تانىتتى. ەكىنشى كەزەڭ 3:2 ەسەبىمەن قازاقستان قۇراماسىنىڭ جەڭىسىمەن اياقتالدى. ءۇشىنشى كەزەڭنىڭ 55-مينۋتىندا قازاقستاندىق انتون نەكرياچ تاعى ءبىر شايبا سوعىپ، ەسەپتى ۇلعايتا ءتۇستى. دەگەنمەن كانادا ساپىنان 57-مينۋتتا كريستوف ۆويۆين ءبىر شايبامەن جاۋاپ قايىردى.

كەزدەسۋدە قازاقستان قۇراماسى كانادانى 4:3 ەسەبىمەن تىزە بۇكتىردى. وسىلايشا ولار B توبىندا ءبىرىنشى ورىن الدى. ەندى ءبىزدىڭ جىگىتتەر شيرەك فينالدا ا ق ش قۇراماسىمەن كەزدەسەدى. ولار A توبىندا ءتورتىنشى ورىن العان ەدى. ويىن 11- ناۋرىز كۇنى وتەدى.