ايەلدەر ەڭ كوپ وڭىرلەر اتالدى

بۇل مالىمەتتى ۇلتتىق ەكونوميكا مينيسترلىگى ستاتيستيكا كوميتەتىنىڭ وكىلدەرى Tengrinews.kz -تىڭ ساۋالحاتىنا بەرگەن جاۋابىندا كەلتىردى.

كوميتەتتىڭ مالىمەتىنشە، بيىلعى قاڭتارداعى ستاتيستيكا بويىنشا، ايەلدەر ەڭ كوپ تۇراتىن وڭىرلەردىڭ ۇشتىگىنە الماتى قالاسى (1028926 ايەل)، تۇركىستان وبلىسى (976842 ايەل) جانە قاراعاندى وبلىسى (724343 ايەل) وڭىرلەرى كىردى.

ارتىنشا تىزىمدە شىعىس قازاقستان وبلىسى (720648)، جامبىل وبلىسى (571076)، استانا (560738)، شىمكەنت (525701)، قوستاناي (458394)، اقتوبە وبلىسى (448428)،  قىزىلوردا وبلىسى (395849) تۇر. ال ايەلدەر سانى ەڭ از ءوڭىر، كوميتەتتىڭ مالىمەتىنشە، اتىراۋ وبلىسى ەكەن. وندا 321291 ايەل تۇرادى ەكەن. سونداي-اق 2019 -جىلدىڭ 1 -قاڭتارىنداعى جاعداي بويىنشا، ەلىمىزدەگى ايەلدەردىڭ سانى 9482374 بولسا، ەرلەردىڭ سانى 8913286 ادامعا جەتكەنى ايتىلادى.

«2018 -جىلدىڭ 4-توقسانىنداعى حالىقتىڭ جۇمىسپەن قامتىلۋىنا جۇرگىزىلەتىن ىرىكتەمەلى زەرتتەۋ قورىتىندىلارى بويىنشا ەلىمىزدە جۇمىسسىز ايەلدەردىڭ سانى 237,5 مىڭ ادامعا جەتتى. وسىلايشا، جۇمىسسىزدىق دەڭگەيى 5,3 پايىز بولدى. جۇمىسسىز ايەلدەر قۇرىلىمىندا 15-24 جاستاعىلار - 7,9 پايىز، 25-34 جاستاعىلار -  40,2 پايىز، 35-54 جاستاعىلار -  42,1 پايىز، 55 جانە ودان اسقاندار -  9,8 پايىز»، -  دەلىنگەن كوميتەتتىڭ رەسمي ساۋالعا جولداعان جاۋابىندا.

ال باسشىلىق لاۋازىمداعى جانە مەملەكەتتىك قىزمەتتەگى ايەلدەرىڭ سانى 148,9 مىڭ ادام ەكەن. ادىلەت سالاسىنداعى قىزمەت جانە سوت ادىلدىگى بويىنشا ەكونوميكالىق قىزمەت تۇرىندەگى قىزمەتكەرلەردىڭ سانى -  36076، ونىڭ ىشىندە ايەلدەردىڭ سانى -  17304. قوعامدىق ءتارتىپ پەن قاۋىپسىزدىكتى قامتاماسىز ەتۋ بويىنشا قىزمەت ەكونوميكالىق قىزمەت ءتۇرى بويىنشا قىزمەتكەرلەردىڭ سانى -  78402، ونىڭ ىشىندە ايەلدەردىڭ سانى -  13296 ادام. بۇدان بولەك، ەلىمىزدەگى ايەلدەر مەن ەرلەردىڭ جالاقىسىنىڭ اراقاتىناسى جايلى ستاتيستيكالىق مالىمەتكە سۇيەنسەك، بۇگىندە قازاقستاندىق ايەلدەردىڭ ورتاشا جالاقىسى 121793 تەڭگە بولسا، ەرلەردىكى -  179575 تەڭگە. ال اراقاتىناسى 67,8 پايىزعا تەڭ ەكەن.