قىتاي مەملەكەتتىك قىزمەتشىلەرگە جۇمسالاتىن بيۋدجەت شىعىندارىن قاتاڭ باقىلاۋعا الادى
استانا. قازاقپارات - قىتاي 2019 -جىلى جالپى ىشكى ءونىمنىڭ ءوسىمىن %6-6,5- كە جەتكىزبەكشى. ۇكىمەت بىلتىر %2,1 بولعان ينفلياتسيا دەڭگەيى % 3 قۇرايدى دەگەن بولجام جاسادى.
سونىمەن بىرگە 11 ميلليون جاڭا جۇمىس ورىنىن اشۋدى جوسپارلايدى. پارلامەنتتىڭ جىل سايىنعى سەسسياسىندا باياداما جاساعان قىتاي پرەمەرى وسىلاي دەپ مالىمدەدى.
«بيىل الەمدەگى ەكىنشى ەكونوميكا قيىندىقتارمەن بەتپە- بەت كەلۋى مۇمكىن. سوندىقتان كۇرەسكە دايىن بولۋىمىز كەرەك» دەيدى لي كىشياڭ.
بۇكىل قىتايلىق حالىق وكىلدەرىنىڭ جيىنىندا لي كىشياڭ ەلدىڭ ىشكى جانە سىرتقى جاعدايىنا تولىق تالداۋ جاسادى. پرەمەردىڭ ايتۋىنشا، مەملەكەت ءوز ماقساتىن جۇزەگە اسىرۋ ءۇشىن قيىن دا كۇردەلى جاعدايلاردى ەڭسەرە ءبىلۋى ءتيىس.
«بيىل تاۋەكەل مەن سىن- تەگەۋرىن كوپ. سوندىقتان كۇرەسكە دايىن بولۋىمىز كەرەك. ەل ەكونوميكاسىنا قاۋىپ تونسە قاپەرسىز وتىرۋعا بولمايدى» دەدى ۇكىمەت باسشىسى. ونىڭ سوزىنشە قىتاي ەكونوميكاسى تۇراقتى جانە ونى ساقتاپ قالادى. ەلدىڭ 2019 -جىلعى بيۋدجەتى ۇنەمگە نەگىزدەلەدى. ۇكىمەت مەملەكەتتىك قىزمەتشىنىڭ شىعىنىن ازايتۋ ارقىلى بيزنەسكە تۇسەتىن اۋىرتپالىقتى ازايتپاقشى.
نۇربەك بەكەن، ءتىلشى:
- قىتاي ۇكىمەتىنىڭ وسى جىلعا ارنالعان دامۋ جوسپارىندا بيزنەسكە تۇسەتىن سالماقتى ازايتۋ ءۇشىن بارلىق دەڭگەيدەگى ۇكىمەتتىك مەكەمەلەر ۇنەمگە كوشۋى ءتيىس دەپ جازىلعان. بيلىك كىرىس كوزىن ارتتىرىپ، نەگىزگى شىعىنداردى ازايتۋعا مىندەتتى. اسىرەسە شەتەلدىك رەسمي ساپارلارعا، مەملەكەتتىك قىزمەتشىلەردىڭ كولىكتەرىنە جۇمسالاتىن بيۋدجەتتىك شىعىندار قاتاڭ باقىلانادى. باياندامادا ءتيىمسىز، كوپ جىلدان بەرى ورىنسىز جۇمسالىپ كەلە جاتقان قاراجاتتاردى قايتا قاراستىرۋ نەمەسە قايتارۋ قاجەت دەلىنگەن.
بيىل بيۋدجەتتىك شىعىندار ۇكىمەتتەن باستاپ، ايماقتىق دەڭگەيگە دەيىن قاتاڭ باقىلاۋعا الىنادى. سىبايلاس جەمقورلىقپەن كۇرەس تە جالعاسىن تابادى. بيلىكتىڭ ماقساتى - ادال ءارى تازا ۇكىمەت قۇرۋ.
لي كىشياڭ، قىتاي پرەمەرى:
- اۋديتورلىق جانە ريەۆيزيالىق تەكسەرىستەردى كۇشەيتۋ قاجەت. مەملەكەتتىك قىزمەتكەرلەر زاڭعا ساي قاداعالاۋشى ورگاندار مەن حالىق الدىندا ءوزىن ۇنەمى باقىلاۋدا ۇستاۋى كەرەك. پارتيانىڭ نەگىزگى ميسسياسىن ورىنداۋ ءۇشىن ناقتى قادامدار جاسايتىن بولامىز.
لي كىشياڭ تازا ۇكىمەت قۇرۋ ءۇشىن بيلىكتىڭ بارلىق تارماعى جۇمىلىپ جۇمىس ىستەۋى كەرەگىن ايتتى. سوندا بىردە- ءبىر مەملەكەتتىك قىزمەتشىنىڭ پارا الۋعا ءداتى بارمايتىن بولادى.
اۆتورلارى: نۇربەك بەكەن، جاڭ ءسۇي