شىمكەنتتىڭ كىلەم فابريكاسى ءوندىرىس قۋاتتىلىعىن ۇلعايتپاق

 «يندۋستريالاندىرۋ كارتاسى» باعدارلاماسى اياسىندا ىسكە قوسىلعان كىلەم توقۋ فابريكاسى بۇگىندە ءۇشىنشى كەزەڭدەگى جۇمىسىن باستادى. ءوندىرىس ورنىندا قازىر 10 توقىما قوندىرعىسى بار. ونىڭ ۇشەۋىن كومپانيا وسى ءۇشىنشى كەزەڭدە ىسكە قوسقان.

فابريكا بۇگىندە ەلىمىزدەگى ەڭ ءىرى ءوندىرىس ورىندارىنىڭ ساپىنا كوتەرىلدى. كاسىپورىن كىلەم توقۋمەن قاتار، پوليپروپيلەن جىپتەرىن وزدەرى دايىنداپ يىرۋمەن اينالىسادى. كاسىپورىن جىلىنا شامامەن 3 ميلليون شارشى مەتر كىلەم ونىمدەرىن شىعارادى. بۇعان قوسا 3 مىڭ تونناعا دەيىن پوليپروپيلەن ءجىبىن ءوندىرىپ، ونى بوياپ، قاجەتتى دەڭگەيدە ءيىرىپ كىلەمگە پايدالانادى.

 تەكستيل ءونىمىنىڭ 23 پروتسەنتى ەكسپورتقا جونەلتىلەدى. «قازاقستاندا جاسالعان» بەلگىسىمەن شىعاتىن وتاندىق ءونىم كورشىلەس رەسەي، قىرعىزستان تاجىكستان جانە ءازىربايجان ەلدەرىندە ساۋدالانادى. جالپى توقىما فابريكاسىنداعى قىزمەتكەرلەردىڭ 70 پروتسەنتى جاستار.

تالعات ىسقاقوۆ، كىلەم فابريكاسىنىڭ باس ديرەكتورى:

 - بۇل ءۇشىنشى كەزەڭگە ءبىز 1,3 ميلليارد تەڭگە قاراجات ينۆەستيتسيا جۇمسادىق. مۇنىڭ 800 ميلليون تەڭگەسىن مەملەكەت ءوندىرىس باعدارلاماسى بويىنشا نەسيە الدىق. قالعان قاراجاتتى كومپانيا ءوز قاراجاتىنان جۇمساپ يگەردىك. ءۇشىنشى كەزەڭ بويىنشا جۇمىستا ادامداردىڭ سانىن ارتتتىردىق. بۇرىن بىزدە 245 ادام جۇمىس ىستەيتىن بولسا، قازىرگى تاڭدا بىزدە 310 ادامعا ۇلعايدى.

www.24.kz