فۋتبول ەرەجەسىنە وزگەرىستەر ەنگىزىلەدى

فۋتبول ەرەجەسىنە سايكەس، دوپ قولعا تيمەۋى ءتيىس. وسىعان دەيىن ابايسىزدا دوپ قولعا تيسە، اسا قاتتى ەرەجە بۇزىلدى دەپ ەسەپتەلمەيتىن. ەندى فۋتبولشى ابايسىزدا دوپتى قولىنا تيگىزىپ الىپ، گول سوققانمەن، ناتيجە وزگەرمەيدى. بۇل ساتتە تورەشى ەرەجە بۇزىلعانى جايلى شەشىم قابىلدايتىن بولادى. ەكىنشى وزگەرىس ويىنشى الماسۋ جايلى. وسىعان دەيىن الاڭداعى ويىنشى جاڭا ويىنشىنىڭ قولىن الىپ، قوسالقى قۇرام تۇسىنداعى ورتادان ءوز ورنىن بوساتاتىن. ال بۇل ماڭايعا جاقىنداعانعا دەيىن ءبىرشاما ۋاقىت وتەدى. جەڭىپ تۇرعان كوماندا ويىنشىلارى مۇندايدا قۋلىققا دا بارادى. جاڭا وزگەرىس بويىنشا الاڭداعى فۋتبولشى ءوز ورنىن بەرۋ ءۇشىن الاڭنىڭ كەز كەلگەن قاپتالىنان شىعۋىنا بولادى.

 تاعى ءبىر وزگەرىس ايىپ دوبىن ورىنداۋ كەزىندەگى توسقاۋىلعا تۇراتىن ويىنشىلار جايلى. سەبەبى شابۋىلداۋشى كوماندانىڭ فۋتبولشىلارى دا توسقاۋىلعا تۇرىپ الاتىن. ناتيجەسىندە جاتتىعۋ كەزىندە دايارلاعان جۇيەلەرى ارقىلى گول سوعۋدى جۇزەگە اسىرۋعا تىرىساتىن. جاڭا وزگەرىس بۇل ەرەجەنى وزگەرتتى. قارسىلاس كوماندا ويىنشىلارى توسقاۋىلعا تۇرمايدى. توسقاۋىلدان كەم دەگەندە 1 مەتر الىس تۇرۋلارى ءتيىس.

 پەنالتي تەبۋ كەزىندە قاقپاشىنىڭ ەكى اياعى دا قاقپا سىزىعىنان اسپاۋى ءتيىس بولاتىن. ەندى ءبىر اياعى اسپاسا دا جارايدى. ەكى اياعى دا سىزىقتا بولۋى مىندەتتى ەمەس. سارى قاعاز نەمەسە قىزىل قاعاز تارتىبىنە بايلانىستى فۋتبولشىلارعا عانا ەمەس، ەندى ولاردىڭ رەسمي وكىلدەرىنە (جاتتىقتىرۋشى، قوسالقى قۇرام) دە كورسەتىلەدى. دوپ تورەشىگە ءتيىپ، قارسىلاس كومانداعا قول بولاتىن ساتتەر بولادى. ەندى دوپ تورەشىگە تيگەن جاعدايدا ويىن توقتاتىلىپ، ەركىن سوققى جاسالادى.

فۋتبول ەرەجەسىنە جاڭا وزگەرىستەر بيىل جازدان باستاپ ءوز كۇشىنە ەنەدى. ايتا كەتەيىك، IFAB 1886 -جىلى بريتاندىق فۋتبول قاۋىمداستىقتارىنىڭ (انگليا، شوتلانديا، ۋەلس جانە يرلانديا) كەلىسىمى بويىنشا قۇرىلعان.

Massaget.kz