استانادا جۇكتى ايەل پەريناتالدىق ورتالىقتىڭ ەدەنىنە بوسانىپ قالعان
وقيعا تۋرالى اكىمدىكتە وتكەن وتىرىستا ەلوردا باسشىسى باقىت سۇلتانوۆ ايتتى، دەپ حابارلايدى قازاقپارات.
اكىمنىڭ سوزىنە قاراعاندا، وقيعا 2№ پەريناتالدىق ورتالىقتا 19- اقپان كۇنى بولعان. ورتالىقتىڭ بوسانۋ بولىمىندە كەلىنشەك دارىگەرلەردىڭ كومەگىنسىز، ءوزى ەدەنگە بوسانعان.
«ابىروي بولعاندا بالا مەن انانىڭ دەنساۋلىعىنا زيان كەلمەگەن. ءبىراق، بۇل جاعداي ەرەكشە باقىلاۋعا الىنۋى ءتيىس دەپ ويلايمىن. مۇنداي وقيعالار جۇيەسىزدىكتىڭ سالدارىنان ورىن العان»، - دەدى ب. سۇلتانوۆ.
سونىمەن قاتار، ول 2018-جىلى بوسانۋ كەزىندە سەگىز ايەلدىڭ قايتىس بولعانىن، وقيعالار سانىنىڭ 2017-جىلعى كورسەتكىشتەن ءتورت ەسە جوعارى ەكەندىگىن العا تارتتى.
«ءبىزدىڭ دەنساۋلىق ساقتاۋ جۇيەسىندە مۇنداي بىلىقتار نەلىكتەن ورىن الۋدا؟» - دەپ سۇرادى اكىم قوعامدىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ءاليا رۇستەموۆادان.
«مۇنداي جاعدايدىڭ ورىن العانى، راس. جۇكتى ايەل 18- اقپاندا كەلىپ ءتۇستى. 19- اقپاندا ونىڭ تولعاعى كۇشەيە باستاعان. ساعات 12 دە بولىمشە مەڭگەرۋشىسى ونى قاراعاندا، ول بوسانۋ بولىمشەسىندە بولعان. ول جىلدام بوساندى. بۇل كۇنى بولىمشەدە 37 ايەل تۋدى. وسى ۋاقىتتا ءۇش اكۋشەر ءتورت ايەلدى بوساندىرىپ جاتقان بولاتىن. سونداي-اق، بارلىق دارىگەرلەردىڭ قاتىسۋىمەن وپەراتسيا جاسالىپ جاتتى. نە دەسەكتە، بۇل جاعدايدا ولقىلىقتار بار»، - دەپ جاۋاپ بەردى ول.
وسى رەتتە، قالا باسشىسى ءا. رۇستەموۆاعا رەسمي ەسكەرتۋ جاسايتىنىن ايتتى.
«دەمەك، ءتيىستى كۇش سالۋ كەرەك. سىزگە رەسمي تۇردە ەسكەرتۋ جاساپ وتىرمىن. بارلىق جۇيە بويىنشا شارالار قولدانىڭىز. بۇل بارلىق باسقا مەديتسينالىق مەكەمەلەر ءۇشىن بەلگى بولۋى ءتيىس. سونداي-اق، بارلىق دەنساۋلىق ساقتاۋ نىساندارىنىڭ جۇمىسىنا مونيتورينگ جۇرگىزىپ، شتاتتان تىس بارلىق جاعدايلار بويىنشا ناقتى ءىس-قيمىل الگوريتمىن پىسىقتاڭىز»، - دەپ تاپسىردى ب. سۇلتانوۆ.
ايتا كەتەيىك، اكىمدىكتە وتكەن اتالمىش وتىرىس بارىسىندا ەلوردا باسشىسى باقىت سۇلتانوۆ، سونداي-اق جۋىردا وقۋشى بالانىڭ قۇدىققا قۇلاپ، مەرت بولۋىنا بايلانىستى جاۋاپتى تۇلعالارعا قاتاڭ سوگىس جاريالادى.