قازاقستاندا زاڭسىز بايىعاندار جاۋاپكەرشىلىككە تارتىلادى

اگەنتتىك ءتوراعاسىنىڭ ورىنباسارى ولجاس بەكتەنوۆتىڭ ايتۋىنشا، بۇگىندە سىبايلاس جەمقورلىقپەن كۇرەس سالاسىنداعى ۇزدىك تاجىريبەنى ەنگىزۋگە باسىمدىق بەرىلىپ وتىر. وعان قوسا، ەكونوميكالىق ىنتىماقتاستىق جانە دامۋ ۇيىمىنىڭ كەڭەستەرى ءارى ب ۇ ۇ جەمقورلىققا قارسى كونۆەنتسياسىنىڭ تالابى بار.

«كونۆەنتسيانىڭ 20-بابىندا زاڭسىز بايىعانى ءۇشىن جاۋاپكەرشىلىكتى ەنگىزۋ مىندەتى جازىلعان. قازاقستان اتالعان قۇجاتتى 2008-جىلى راتيفيكاتسيالاعان بولاتىن. وسىعان بايلانىستى بۇگىندە ءبىز وسى يدەيانى جان-جاقتى دامىتىپ، باسقا مەملەكەتتىك ورگاندارمەن بىرلەسىپ جۇمىس ىستەپ جاتىرمىز. 2020-جىلى كىرىستەر مەن شىعىستاردى جالپىعا ورتاق دەكلاراتسيالاۋ ەنگىزىلەتىنى بەلگىلى. سونىڭ اياسىندا زاڭسىز بايىعانى ءۇشىن جاۋاپكەرشىلىكتى ەنگىزگەن دۇرىس دەپ سانايمىز. ماسەلەن، شەنەۋنىكتىڭ شىعىستارى كىرىسىنەن ارتىق بولسا، بەلگىلى ءبىر جاۋاپكەرشىلىك قاراستىرىلۋى شارت»، - دەدى و. بەكتەنوۆ مەملەكەتتىك قىزمەتتىڭ جاڭا فورماتىن قالىپتاستىرۋعا ارنالعان پانەلدىك سەسسيادا.

ايتا كەتەيىك، بۇگىنگى جيىندا اگەنتتىك باسشىلىعى سىبايلاس جەمقورلىققا قارسى ءىس-قيمىل ۇلتتىق بيۋروسىن وڭتايلاندىرۋ ناتيجەسى دە جاريالاندى. ولجاس بەكتەنوۆتىڭ ايتۋىنشا، وسى ۋاقىتقا دەيىن سىبايلاس جەمقورلىققا قارسى ءىس-قيمىل ۇلتتىق بيۋروسىندا 250 گە جۋىق باسشىلىق قىزمەتى قىسقارتىلدى. بۇدان بولەك، ارتىق قۇرىلىمدار وڭتايلاندىرىلدى. سونىڭ ەسەبىنەن شۇعىل تەرگەۋ قىزمەتى كۇشەيتىلدى.

«بۇرىن ۇلتتىق بيۋرودا باسشىلار مەن قىزمەتكەرلەردىڭ ارا قاتىناسى 1:2، ياعني ءبىر باستىقتىڭ قول استىندا ەكى ادام بولسا، قازىر اتالعان كورسەتكىش دامىعان مەملەكەتتەردىڭ دەڭگەيى - 1:8 گە جەتتى. سوسىن قۇقىق قورعاۋشىلاردى اشىق كونكۋرس نەگىزىندە جۇمىسقا قابىلدايتىن بولدى. جالپى، ۇلتتىق بيۋرو بويىنشا شامامەن 1 ميلليارد تەڭگە ۇنەمدەلدى. وسىنىڭ ناتيجەسىندە قىزمەتكەرلەردىڭ جالاقىسى 2 ەسەدەن ارتىق ءوستى. ول جەردە پرەزيدەنتتىك ءوسىماقى دا بار. وعان تاعى ۇنەمدەلگەن قارجىنىڭ ۇستەماقىسى قوسىلادى. بۇگىندە سىبايلاس جەمقورلىققا قارسى ءىس-قيمىل ۇلتتىق بيۋروسى ەڭ جوعارى جالاقى الاتىن قۇقىق قورعاۋ ورگانى بولىپ سانالادى»، - دەيدى و. بەكتەنوۆ.